ЗАНОН ДАР СОҲАИ ИЛМ. Сиёсати Пешвои миллат барои дастгирии занону духтарони болаёқат ва онҳое, ки илму дониши ба талабот ҷавобгӯ доранд, равона шудааст

 БОХТАР, 14.02.2018 /АМИТ «Ховар»/. Дар  вилояти Хатлон 350  нафар олимон  фаъолият доранд,  ки 47 нафарашонро  занон ташкил медиҳанд. Аз ҷумла,  3  нафар зан  доктори  илм, профессор, 43  нафар  номзади илм буда, 14  нафарашон дотсент мебошанд. Ғайр  аз ин  дар вилоят теъдоди  зиёди занон унвонҷӯ  мебошанд. Ин суханонро муовини раиси вилояти Хатлон Махфират Хидирзода зимни конференсияи  илмӣ-назаривӣ бахшида  ба  Рӯзи  умумиҷаҳонии  занон  дар  соҳаи  илм баён дошт.

Ёдовар мешавем, ки дар  шаҳри Кӯлоб  дар  мавзӯи  «Занон ва  рушди  илми  муосир» конференсияи  илмӣ-назаривӣ баргузор  гардид.

Тавре аз  Раёсати кор  бо  занон  ва  оилаи вилояти  Хатлон  ба  АМИТ «Ховар»  иттилоъ  доданд,  дар  семинар  занон-намояндагони илм  аз  донишгоҳу коллеҷҳои Бохтар,  Кӯлоб ва  Данғара  ширкат  варзиданд.

Дар маросими  ифтитоҳи конфронс  муовини раиси  вилояти  Хатлон  Махфират  Хидирзода  саҳми  занонро  дар рушди илми  муосир  назаррас  номида, аз ҷумла, гуфт, ки «шумораи  занони олимаи тоҷик  сол  ба  сол меафзояд. Шурӯъ аз солҳои аввали соҳибистиқлолии мамлакат то ба имрӯз пай дар пай аз ҷониби Пешвои миллат ҷиҳати ҷалби духтарону занон  ба илм ва таҳсил тадбирҳои мушаххас андешида шуданд. Қабул гардидани қарорҳои Ҳукумати Ҷумҳурии Тоҷикистон ва барномаҳои давлатӣ дар мамлакат дар соҳаи илм  барои ҷалб ва дастгирии ҷавонондухтарон ба илм замина фароҳам овард. Имрӯз он сиёсате, ки Пешвои миллат ва Ҳукумати Ҷумҳурии Тоҷикистон пеш бурда истодаанд, пеш аз ҳама, барои дастгирии занону духтарони болаёқат ва ҳамаи онҳое, ки илму дониши  ба талабот ҷавобгӯ доранд, равона карда шудааст».