БИНОД ЧАУДҲАРӢ ДАР ТОҶИКИСТОН. Имкониятҳои сайёҳии мамлакат ба мултимиллиардери Непал муаррифӣ гардиданд

ДУШАНБЕ, 24.03.2018./АМИт «Ховар»/. Бинод Чаудҳарӣ ҷиҳати муаррифии китоби тарҷумаҳолии худ бо номи «Бозии калон: сарнавишти ибратангези нахустин миллиардери Непал» ин ҳафта аз кишварҳои Осиёи Марказӣ боздид ба амал овард. Зимни сафар Бинод Чаудҳарӣ аз шаҳрҳои Бишкек, Остона, Алмаато, Тошканд ва Душанбе дидан намуд.

Бинод Чаудҳарӣ зимни сафараш ба Тоҷикистон дар Кохи Малика бо муовини раиси Кумитаи рушди сайёҳии назди Ҳукумати Ҷумҳурии Тоҷикистон Ширин Амонзода вохўрӣ намуд.

Ширин Амонзода меҳмони непалиро ба Наврўзи оламафрўз, ки рамзи офариниши ҳаёт, эҳёи табиат ва яке аз суннатҳои қадимтарини мардуми мо ба ҳисоб меравад шодбош намуд.

Зимни мулоқот ба масоили рушди ҳамкориҳои тиҷоратӣ, ҷалби сармоя ба инфрасохтори сайёҳӣ дахл карда шуда, зикр гардид, ки бо ибтикори Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Наврўзи аҷдодӣ мақоми ҷаҳонӣ гирифта, арзишҳои миллии моро ба ҷаҳониён муаррифӣ менамояд.

Ҳамзамон, сиёсати хориҷии “дарҳои боз”-и Ҳукумати Ҷумҳурии Тоҷикистон имкон фароҳам меорад, ки ҳамкорӣ бо доираҳои соҳибкорӣ ва сайёҳӣ равнақ ёфта, таъриху фарҳанг ва анъанаҳои миллӣ бо таври шоиста дар бозори ҷаҳонии соҳавӣ муаррифӣ карда шавад.

Бинод Чаудҳарӣ иброз дошт, ки ба бозори Осиёи Марказӣ аз ҷумла, Тоҷикистон дар соҳаҳои саноат ва рушди сайёҳӣ таваҷҷуҳи хоса зоҳир намудааст, зеро имкониятҳои сайёҳии Тоҷикистон хеле бузург аст.

Дар доираи сафари худ соҳибкори муваффақи Непал Бинод Чаудҳарӣ аз маконҳои тамошобоби шаҳри Душанбе, аз ҷумла Боғи Парчам, Наврўзгоҳ, Кохи Наврўз ва дараи хушманзараи Варзоб боздид намуд.

Хотиррасон менамоем, ки алҳол сармояи Бинод Чаудҳарӣ аз 1,5 миллиард доллари ИМА бештар аст. Бино ба маълумоти расонаҳо, ӯ айни замон ягона миллиардери Непал буда, соли 2013 маҷаллаи амрикоии «Forbes» исми ӯро ба рӯйхати сарватмандтарин одамони сайёра шомил намудааст.

Бинод соҳибкори авлодӣ мебошад. Бобои ӯ Бхурамалл воридоти матоъҳои ҳиндиро ба Непал ба роҳ монда, ин корро падараш Лункаран Дас тақвият бахшидааст. Падараш воридоти матоъҳоро аз Япония ва Корея, инчунин содироти нахи пахтаро ба Иёлоти Муттаҳидаи Амрико роҳандозӣ намудааст. Падараш бемор шуд ва Биноди 18-сола маҷбур гардид, ки таҳсилро партофта, сарварии тиҷорати оилавиро ба дӯши худ бигирад. Ҳоло Бинод Чаудҳарӣ 62 сол дорад во корпоратсияи «Chaudhary Group(CG)»-ро, ки аз 80 ширкати алоҳида иборат аст, роҳбарӣ мекунад. Бинод инчунин Фонди хайрияи ба номи Чаудҳариро таъсис додаст, ки ҷиҳати рушди маориф, тандурустӣ, варзиш ва тавсеаи ҳуқуқу имкониятҳои ҷавонон дар непал маблағгузорӣ мекунад.

Қобили зикр аст, ки ташрифи чеҳраҳои шинохтаи ҷаҳонӣ ба кишвар дар бозорҳои байналмилалӣ маълумотро дар бораи давлат зиёд менамояд. Аз дигар ҷониб ба болоравии имиҷи кишвар дар сатҳи байналмилалӣ барои густариши муносибатҳо дар бахши сармоягузорӣ шароит фароҳам меорад.