Дар ноҳияи Рашт хизматрасонии тиббии дандонпизишкӣ ба аҳолӣ дар сатҳи паст қарор дорад

РАШТ, 11.03.2018 /АМИТ «Ховар»/.  Аз тарафи мутахассисони  Маркази назорати санитарию эпидемиологии ноҳияи Рашт соли 2017 нисбат ба 149 нафар кормандони соҳаҳои гуногуни ноҳия барои вайрон намудани коидаҳои санитарӣ   санади  ҳуқуқвайронкунии маъмурӣ тартиб дода шуда, онҳо ба маблағи 17 ҳазору 550 сомонӣ ҷарима шуданд. Аз ин шумора 30 нафар табибони дараҷаи олӣ ва миёнаи тиббӣ мебошанд, ки маблағи ҷаримаи онҳо 4000 сомониро ташкил намуд. Ин маълумотро  ба хабарнигори АМИТ «Ховар» муовини директори Маркази назорати санитарию эпидемиологии ноҳияи Рашт Умар Темуров пешниҳод намуд.

Тибқи иттилои мутахассисон, табибону кормандони соҳаи тандурустӣ, махсусан дандонпизишкон  риояи қоидаҳои санитариро бояд дар мадди аввал иҷро намоянд, то беморон аз заҳролудшавию гирифторӣ ба микробу вирусҳои сироятӣ эмин бошанд. Вале санҷишҳои Маркази назорати санитарию эпидемиологии ноҳияи Рашт дар соли 2017 нишон доданд, ки аз тарафи кормандони соҳаи тандурустии ноҳия вайрон намудани коидаҳои санитарӣ нисбат ба соли 2016 10 адад зиёд гардидааст. Масъулини ин соҳа мебоист соли 2017 ба қоидавайронкунии санитарию эпидемиологӣ кам роҳ дода, аз паи ислоҳи он мешуданд. Вале маълум мегардад, ки онҳо нисбат ба саломатии аҳолӣ беаҳамиятӣ зоҳир карда, ба риоя  намудани қоидаҳои санитарию эпидемиологӣ миёни кормандони соҳа таваҷҷуҳи зарурӣ  намедиҳанд. Ин ҳолат гувоҳи он аст, ки  хизматрасонии тиббӣ, бахусус  дар соҳаи дандонпизишкӣ дар ноҳияи Рашт дар сатҳи паст қарор дорад.