Дар нуқтаи бақайдгирии Маркази миллии тестӣ дар шаҳри Ваҳдат ба сокинон сари вақт хизмат расонида мешавад

ВАҲДАТ, 13.03.2018 /АМИТ «Ховар»/. Нуқтаи  бақайдгирии Маркази миллии тестии назди Президенти Ҷумҳурии Тоҷикистон  дар шаҳри Ваҳдат аз рӯзи якуми марти соли равон ба кор шурӯъ намуда, ҳамарӯза аз саҳар то бегоҳ ба хонандагону падару модари онҳо хизмат мерасонад.

Роҳбари ин нуқтаи бақайдгирӣ Хайриддин Ҳалимзода  иброз намуд, ки «имсол нисбат ба солҳои пеш волидайни хонандагон зиёдтар кӯшиш  доранд, то сари вақт фарзандонашонро ба қайд гиранд.  То имрӯз зиёда аз 300 нафар хатмкунандагон ба қайд гирифта шуда, дар як рӯз ба ҳисоби миёна 40-50 нафар аз қайд мегузаранд.
Тибқи иттилои масъулин, хонандагони шаҳрҳои Роғун, Норак  ва ноҳияҳои Файзободу як қисмати Ёвон ба ин нуқтаи бақайдгирӣ муроҷиат мекунанд. Масъулин роҳи дури онҳоро ба назар гирифта, сари вақт ба онҳо хизмат мерасонанд».