«ИССИҚКӮЛ ДӮСТОНРО ДАЪВАТ МЕНАМОЯД». Дар Қирғизистон этно-карнавали байналмилалӣ баргузор мешавад

ДУШАНБЕ, 29.03.2018. /АМИТ «Ховар»/. Ҷумҳурии Қирғизистон бахшида ба Соли рушди минтақаҳои Қирғизистон ва 90-солагии Нависандаи халқии Қирғизистон Чингиз Айтматов ҳамоиши байналмилалии кӯдакону наврасон – Озмуни гурӯҳҳои эҷодӣ ва ҳамоиши гурӯҳҳои сайёҳиро таҳти унвони «Иссиқкӯл аз нигоҳи кӯдакон– 2018» ва Этно-карнавали байналмилалии «Иссиқкӯл дӯстонро даъват менамояд– 2018»-ро баргузор менамояд.

Тавре аз маркази матбуоти Вазорати фарҳанги Ҷумҳурии Тоҷикистон ба АМИТ «Ховар» хабар доданд, барои иштирок дар барномаҳои мазкур, ки 1-7 июл ва 13-20 июли соли 2018 сурат мегиранд, донишҷӯёни студияҳои хореографию вокалӣ, маҳфилҳои сайёҳӣ, экологӣ ва кишваршиносӣ даъват карда мешаванд.

Ба иттилои манбаъ, иштирокчиёнро дарсҳои сайқали маҳорат дар мавзӯъҳои гуногун, намоишҳо, барномаҳои консертӣ ва гала-консерти анъанавӣ интизоранд.

Хоҳишмандон метавонанд маълумоти муфассалро оид ба шартҳои иштирок дар озмунҳо аз сомонаи www.balajan.kg ё суроғаи электронии t-mail balajan@mail.ru дастрас намоянд.