ОБУ ҲАВО: Дар Рӯзи Модар ҳавои тағйирёбандаи бебориш дар назар аст

ДУШАНБЕ, 08.03.2018 /АМИТ «Ховар»/. Ба иттилои Агентии обуҳавошиносӣ, имрӯз дар қаламрави ҷумҳурӣ ҳавои тағйирёбандаи бебориш шуда, дар баъзе ноҳияҳо фаромадани туман дар назар аст.

Имрӯз, 8 март дар вилояти Суғд ҳаво абрнок шуда, дар баъзе ҷойҳо фаромадани туман дар назар аст. Шамол аз самти ғарб 3-8  ва дар баъзе ҷойҳо то 20-25 метр дар як сония мевазад. Ҳаво дар водиҳо шабона 4-9 дараҷа ва рӯзона 16-21 дараҷа гарм хоҳад шуд.

Ба иттилои Агентӣ, дар Вилояти Мухтори Кӯҳистони Бадахшон ҳавои  абрноки тағйирёбанда ва бебориш пешгӯӣ шудааст. Дар ғарби вилоят ҳаво  шабона 1-6 ва рӯзона 6-11 дараҷа гарм хоҳад шуд. Дар шарқи ин вилоят ҳарорат шабона 12-17 дараҷа сард ва рӯзона 1-4 дараҷа гарм мешавад.

Дар вилояти Хатлон ҳаво тағйирёбанда буда, туман мефарояд.  Шамол аз самти ғарб 3-8  метр дар як сония мевазад. Ҳаво шабона 6-8 ва рӯзона 23-25 дараҷа гарм мешавад.

Дар шаҳру ноҳияҳои тобеи марказ ҳаво абрӣ шуда, фаромадани туман пешбинӣ шудааст. Дар шаҳри Душанбе ҳавои абрноки тағйирёбанда дар назар дошта шудааст. Шабона 4-6 ва рӯзона 21-23 дараҷа гарм мешавад.