Пагоҳ Вазири корҳои хориҷии Бангладеш ба Душанбе меояд

ДУШАНБЕ, 10.04.2018. /АМИТ «Ховар»/.  Пагоҳ  ҳайати Ҷумҳурии Халқии Бангладеш таҳти роҳбарии Вазири давлатии корҳои хориҷӣ, узви Парлумони Бангладеш  Муҳаммад Шаҳриёр Алам  ба  Ҷумҳурии Тоҷикистон ташриф меорад. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Сафари ҳайати Ҷумҳурии Бангладеш дар Тоҷикистон то 14 апрел идома меёбад.

Ҳайати Ҷумҳурии Бангладеш қабл аз сафар ба кишвари мо аз Ҷумҳурии  Ӯзбекистон боздид ба амал овард. Тавре «Вести.uz» навиштааст, ҳайати  Ҷумҳурии Бангладеш, ки ба он  намояндагони соҳаи соҳибкорӣ ва тиҷорати ин кишвар шомил мебошанд, дар парлумон, ВКХ Ӯзбекистон мулоқотҳо доир намуда, дар ҳамоиши соҳибкорони ду кишвар ширкат ва аз шаҳрҳои таърихии Самарқанду Бухоро дидан намуданд.

Хотиррасон менамоем, ки соли 2015 зимни мулоқоти худ бо раиси Палатаи савдо ва саноати Тоҷикистон Шариф Саид Вазири давлатии корҳои хориҷии Ҷумҳурии Бангладеш Муҳаммад Шаҳриёр Алам ба рушди ҳамкориҳо дар соҳаи саноати бофандагӣ ва содироти пахтаи Тоҷикистон ба Бангладеш  таваҷҷуҳи хоса зоҳир  намуда буд.

 Инчунин дар ин ҳафта ташрифи ҳайатҳои зерин ба Тоҷикистон дар назар дошта шудааст:

10-15 апрели соли 2018 – ташрифи сафирони навтаъйини фавқулода ва   мухтори Ҷумҳурии Мисри Араб, Ҷумҳурии Словакия ва Ҷумҳурии Куба барои иштирок дар маросими супоридани эътимодномаҳо ба Президенти Ҷумҳурии Тоҷикистон (13 апрели соли 2018).

13-15 апрели соли 2018 – ташрифи ҳайати Ҷумҳурии Халқӣ-Демократии Корея таҳти роҳбарии Вазири корҳои хориҷӣ ҷаноби Ли Ён Ҳо ба  Ҷумҳурии Тоҷикистон.

15-18 апрели соли 2018 – ташрифи ҳайатҳои иштирокдори ҷаласаи 23-ми Шӯрои вазирони корҳои хориҷии кишварҳои аъзои Созмони ҳамкории  иқтисодӣ  ба  Ҷумҳурии Тоҷикистон.