Саҳми мақомоти гумрук дар рушди сайёҳии Тоҷикистон

ДУШАНБЕ, 25.04.2018 /АМИТ «Ховар»/. «Пешвои миллат -ташаббускори  рушди сайёҳӣ ва эҳёи ҳунарҳои  мардумӣ», — таҳти чунин унвон дар иртибот ба эълон гардидани соли 2018 Соли рушди сайёҳӣ ва ҳунарҳои мардумӣ дар мамлакат дар Хадамоти гумруки назди Ҳукумати Ҷумҳурии Тоҷикистон конференсияи ҷумҳуриявии илмию амалӣ доир гардид, ки  дар он кормандони мақомоти  гумрук, вазорату идораҳои марбута, олимон ва коршиносони соҳа иштирок намуданд.

Тавре мухбири АМИТ «Ховар» хабар медиҳад, дар конференсия муовини Сардори Хадамоти гумруки назди Ҳукумати Ҷумҳурии Тоҷикистон Изатулло Ҳурматзода ва муовини аввали Раиси Кумитаи рушди сайёҳии назди Ҳукумати Ҷумҳурии Тоҷикистон  Ҳабибулло Амирбекзода роҷеъ ба имкониятҳои сайёҳии Ҷумҳурии Тоҷикистон ва нақши мақомоти гумруки Тоҷикистон дар рушди соҳаи сайёҳӣ сухан карданд.

Таъкид гардид, ки Ҷумҳурии Тоҷикистон бо табиати нотакрор, обҳои мусаффо, чашмаҳои  шифобахш,  мавзеъҳои таърихию  фарҳангӣ, олами бойи набототу ҳайвоноти нодир  қалби садҳо сайёҳони хориҷиро тасхир намудааст.

Аз ин рӯ, ҳамасола тамоюли ташрифи сайёҳони хориҷӣ ба Тоҷикистон беш аз пеш меафзояд, ки ин раванд бозгӯи кишвари амну ором дар қораи Осиё ва дорои захираҳои бойи сайёҳӣ будани Тоҷикистон аст.

Зикр гардид, ки Ҳукумати Ҷумҳурии Тоҷикистон  барои рушди соҳаи сайёҳӣ дар мамлакат тадбирҳои саривақтӣ ва иқдоми наҷиб андешида, барномаҳои махсуси давлатӣ барои таъсис ва рушди минтақаҳои сайёҳӣ қабул намудааст, ки Консепсияи рушди туризм дар Ҷумҳурии Тоҷикистон барои солҳои 2009-2019 яке аз онҳост.

Инчунин бо мақсади рушди инфрасохтори сайёҳӣ дар мамлакат  даҳҳо  иншооти  муосири сайёҳӣ, назири  маҷмааи лижаронию  сайёҳии «Сафед-Дара», истироҳатгоҳҳои «Баҳористон», «Пули сангин» ва чандин меҳмонхонаҳои наву замонавии  панҷситорадори бренди  ҷаҳонӣ ба мисли «Sheraton»,  «Hyatt  Regenccy», «Serena» ва ғайраҳо дар Душанбе бунёд гардида, ҳамзамон дигар инфрасохтори сайёҳӣ дар мамлакат таъмиру таҷдид шудаанд.

Ҳамчунин таъкид шуд, ки аз имтиёзҳои андозию гумрукӣ бархӯрдор гардидани ширкатҳои сайёҳӣ, аз ҷумла дар зарфи панҷ соли аввали фаъолияташон аз андози фоида озод намудани ширкатҳои навтаъсиси сайёҳӣ, аз андоз аз арзиши иловашуда ва боҷи гумрукӣ  озод намудани воридоти таҷҳизот ва масолеҳи сохтмонии  иншооти сайёҳӣ ва барои воридоти автомашинаҳои нави сабукрав 50 фоиз коҳиш додани меъёри пардохтҳои гумрукӣ аз дастгириҳои Сарвари давлат нисбати рушди сайёҳӣ ва дар ин замина ҳавасманд намудани соҳибкорон ҷиҳати рушди  инфрасохтори  сайёҳӣ  башорат медиҳад.

Дар конференсия ҳамзамон доир ба паҳлуҳои дигари дастовардҳои сайёҳии Тоҷикистон, саҳми соҳаи сайёҳи дар рушди иқтисодиёти миллӣ, хусусан ғанӣ гардидани буҷаи давлат, рушди инфрасохтори сайёҳӣ  ва тадбирҳои андешидаи мақомоти гумруки Тоҷикистон  дар самти рушди сайёҳӣ дар доираи Соли рушди сайёҳӣ ва ҳунарҳои мардумӣ  пешниҳодҳои ҷолиб ироа гардиданд.

Маврид ба зикр аст, ки тибқи таҳлил ва пешгӯии  мутахассисон ва коршиносони соҳаи сайёҳӣ, интизор меравад, ки то соли 2020 аз Тоҷикистон ҳудуди як миллион сайёҳӣ хориҷӣ  боздид намояд. Ин дар ҳолест, ки  тибқи натиҷаҳои ҳамапурсии агентии таҳлилии «Турстат»-и Россия пойтахти Ҷумҳурии Тоҷикистон — шаҳри Душанбе дар радифи 10 шаҳри дар айёми баҳор барои сайёҳӣ муносиби Иттиҳоди Давлатҳои Мустақил ворид гардидааст.