САЙРУГАШТ ДАР ЛОЛАЗОРИ ДУШАНБЕ. Суратгузориши АМИТ «Ховар»

ДУШАНБЕ, 04.04.2018 /АМИТ «Ховар»/. Тоҷикистонро бо табиати зебову афсункораш сарзамини биҳиштосо ном мебаранд, ки ин воқеият аст. Хусусан  дар фасли баҳорон табиати зебои мамлакатамон сабзу хуррам ва лолазор гардида, тамошои он ба дидаҳо нур ва ба дилҳо сурур мебахшад.  

Мавриди зикр аст, ки  соли 2014 дар  Тоҷикистон ҳангоми авҷи шукуфоии лолаҳои рангоранг ҷашни «Сайри гули лола» таҷлил гардида буд, ки ҳадафаш эҳёи суннатҳои ниёгон дар тарғиби ҳисси зебоипарастӣ, ободу зебо гардонидани муҳити зист, талқини фазилати гулпарварӣ миёни шаҳрвандон, нигоҳдории арзишҳои табиӣ ва дар ин замина ҷалби сайёҳон ва рушди соҳаи туризм дар Ҷумҳурии Тоҷикистон  маҳсуб меёфт. Таъкид гардида буд, ки ҷашни «Сайри гули лола» дар оянда дар Тоҷикистон  дар фасли зебои баҳор ба ҳукми анъана  медарояд.

Дар ин рӯзҳои зебои баҳорӣ   сайругашт дар гулгашту хиёбонҳо ва боғҳои истироҳатии пойтахти мамлакат –шаҳри Душанбе,  ки бо меҳнати шабонарӯзии кормандони сохторҳои марбутаи ободонию сабзгардонии пойтахт дар асоси ташаббусҳои  созандаи  Раиси шаҳри Душанбе Рустами Эмомалӣ  беш аз пеш сабзу хуррам ва обод мегардад,  басо фараҳафзост.

Дар ин росто,  суратгири «Ховар» Тоҳир САИД  зимни гашту гузор дар хиёбонҳои Душанбе манзараҳои дилфиреби лолазори пойтахтро дар дурбини аккосиаш сабт намудааст,  ки ҳоло  онҳоро дар сомонаи  АМИТ «Ховар» ба маъраз мегузорем, то дар радифи сокинони пойтахт ва мамлакат ҳамватанони бурунмарзиамон низ аз зебоиҳои нотакрори лолазори қалби Ватан –Душанбеи домансабзу лолабаоғӯш баҳравар гардида, хушнуд бошанд.