Сармоягузорони бонуфузи институтсионалӣ бо вазъи макроиқтисодии Тоҷикистон шинос шуданд

ДУШАНБЕ, 10.04.2018 /АМИТ «Ховар»/.  Бо мақсади шиносоӣ бо вазъи макроиқтисодии Ҷумҳурии Тоҷикистон, аз ҷумла низоми бонкии кишвар  як гурӯҳ сармоягузорони институтсионалӣ дар ҳайати Бонки Америкоии «Меррил Линч» ва фондҳои сармоягузории «Fidelity», «Metlife», «BNP Paribas», «T.Rowe Price», «Barings», «Eaton Vance» ва «Danske»   ба Бонки миллии Тоҷикистон ташриф оварданд.

Тавре аз Бонки миллӣ ба АМИТ «Ховар» хабар доданд, ҳайати бонуфузи сармоягузоронро муовини якуми раиси Бонки миллии Тоҷикистон Ҷамолиддин Нуралиев ба ҳузур пазируфт. Зимни вохӯрӣ   ба ҳозирин оид ба вазъ ва дурнамои макроиқтисодӣ, низоми бонкии мамлакат, самтҳои асосии барои сармоягузорӣ ҷолиб, мавҷудияти захира ва имкониятҳои зиёд дар соҳаи гидроэнергетика, сайёҳӣ, кишоварзӣ ва нақшаҳои минбаъда дар самти кушодани бозор маълумоти муфассал манзур гардид.

Ҷамолиддин Нуралиев аз мусоидат ба ҷалби сармояи хориҷӣ ба соҳаҳои гуногуни иқтисодиёти кишвар, аз ҷумла, ба низоми бонкӣ бо мақсади рушди иқтисоди миллӣ, таъмини дастрасии соҳибкорон ба воситаҳои молиявӣ, дастгирии соҳибкории хурду миёна бо мақсади рушди истеҳсолот ва таъмини ҷойҳои нави корӣ изҳори назар кард.

Бо иттилои манбаъ, ҳайати корӣ баъди шинос шудан бо вазъи макроиқтисодии мамлакат ба ҶСК «НБО Роғун» сафар карданд. Гурӯҳи кориро   дар шаҳри Роғун директори генералии ҶСК «НБО Роғун» Хайрулло Сафарзода пешвоз гирифта, дар бораи сохтмони иншооти бузурги аср ва корҳои дар ин самт анҷомшуда маълумоти муфассал пешниҳод намуд. Сипас, ҳайати сармоягузорони институтсионалӣ аз иншоотҳои алоҳидаи «НБО Роғун»  дидан карданд.

Бояд зикр намуд, ки   ҳайати мазкур дар доираи сафари худ ба Ҷумҳурии Тоҷикистон баргузор намудани як қатор мулоқотҳоро бо намояндагони Вазорати молия, намояндагии Бонки ҷаҳонӣ, Хазинаи байналмилаии асъор (ХБА) ва Сафорати ИМА дар Тоҷикистон ба нақша гирифтаанд.