Тоҷикистон ва Беларус ҳамкориро дар соҳаи тиб ва тандурустӣ баррасӣ намуданд
![](https://khovar.tj/wp-content/uploads/2018/04/DSC_0467.jpg)
ДУШАНБЕ, 25.04.2018 /АМИТ «Ховар»/. 23 апрел Сафири Фавқулода ва Мухтори Ҷумҳурии Тоҷикистон дар Ҷумҳурии Беларус Маҳмадшариф Ҳақдод бо Вазири тандурустии Ҷумҳурии Беларус Валерий Малашко мулоқот намуд.
Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, ҷонибҳо сатҳи кунунӣ ва дурнамои ҳамкории миёни Ҷумҳурии Тоҷикистон ва Ҷумҳурии Беларусро дар соҳаи тиб ва тандурустӣ мавриди баррасӣ қарор дода, оид ба такмили заминаи шартномавӣ-ҳуқуқии муносибатҳо, афзоиш додани воридоти маҳсулоти тиббии истеҳсоли Беларус ва созмон додани ширкатҳои муштараки истеҳсоли доруворӣ дар Тоҷикистон бо истифода аз захираҳои табиии ватанӣ ва гиёҳҳои шифобахш мубодилаи афкор намуданд .
Ҳамзамон Сафири Тоҷикистон ҷиҳати омода намудани кадрҳои баландихтисос ҳавасмандӣ зоҳир намуд.