Боришоти зиёд сабаби сар задани сел дар шоҳроҳи Душанбе – Чаноқ гардид

Июнь 11, 2018 11:54

ДУШАНБЕ, 11.06.2018 /АМИТ «Ховар»/. Шоми 9 июн  боришоти зиёд  дар   шоҳроҳи Душанбе – Чаноқ  сабаби  сар задани  сел гардиданд. Чунин ҳолат бештар дар  километри 332 то 335  — уми роҳ  (байни ноҳияҳои  Б.Ғафуров ва Мастчоҳ)    ба вуқӯъ омада,  офати табиӣ   баъзе аз канораҳои роҳи мазкурро хароб кард. Айни ҳол ҳаракати воситаҳои нақлиёт тавассути роҳи мазкур таъмин аст.

Тавре аз маркази матбуоти  филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон ба АМИТ «Ховар» хабар доданд, намояндагони ин ширкат  бо мақсади бартараф намудани  оқибатҳои ин офати табиӣ ва дар ҳолати хуб нигоҳ доштани роҳи мазкур тадбирҳои  фаврию зарурӣ андешида, маҷрои селро   пешгирӣ карданд. 

“Ҳатто шабона низ кормандони филиали Ширкат баҳри бартараф намудани монеаҳои мавҷуда камари ҳиммат баста, ба бартараф намудани оқибати ин офати табиӣ машғуланд”, -афзуд манбаъ.

Бояд гуфт, ки роҳи Душанбе–Чаноқ аз минтақаи релефаш душвори кӯҳистон гузашта, дар муқоиса бо дигар роҳҳои  мамлакат аз офатҳои табиӣ, аз ҷумла, тармафароӣ, лағжидани кӯҳпора, сангфароӣ ва омадани сел зиёдтар осебпазир аст.

Филиали Ширкати саҳҳомии “Инновейтив Роуд Солюшнз ЛТД” дар Ҷумҳурии Тоҷикистон аз ҳамаи  ронандагон ва мусофирон хоҳиш менамояд, ки махсусан дар рӯзҳои боронӣ бояд дучанд эҳтиёт кунанд. Ронандагон  пеш аз  баромадан ба сафар  мошинҳои  худро пурра аз назорати техникӣ гузаронда, ҳангоми ҳаракат дар роҳ ба қоидаҳои бехатарӣ риоя намоянд ва ҷони худ ва дигаронро зери хатар нагузоранд.

Мутаассифона,   бо вуҷуди ба роҳ мондани корҳои фаҳмондадиҳӣ як идда ронандагон бе омодагӣ (аз ҷиҳати техникӣ комил набудани воситаи нақлиёт ва ғайра) ба роҳ мебароянд. Дар натиҷа чунин ронандагон дар роҳ ба мушкилӣ мувоҷеҳ гардида, барои ҳаракати дигар воситаҳои нақлиёт  монеа эҷод менамоянд.

Филиали Ширкат  аз ронандагоне, ки    тариқи роҳи  мошингарди Душанбе—Чаноқ  ба сафар мебароянд, хоҳиш менамояд, ки  тавсияҳои ниҳодҳои дахлдорро    (дар ҳолати хуб қарор доштани воситаҳои нақлиёт, аломати исти садамавӣ ва ғайра)  дар мадди назар дошта,  бидуни омодагии ҷиддӣ ба   сафар набароянд.

Дар сурати дучор гардидан ба  мушкилот дар роҳи мазкур  ронандагон метавонанд бо хати доимии  филиали Ширкат, ки  бо шумораи   487011020 фаъол аст, муроҷиат намоянд.   Аз ҷониби кормандони Ширкат  тамоми муроҷиатҳо қабул ва дар ин замина мавриди  тадбирандешӣ  қарор  мегиранд.

 

Июнь 11, 2018 11:54

Хабарҳои дигари ин бахш

Имрӯз дар ноҳияҳои кӯҳии Тоҷикистон ҳаво то 35 дараҷа гарм мешавад
Дар ноҳияи Дарвоз истеҳсоли картошка 3 баробар, сабзавот 5 ва мева 9 баробар афзоиш ёфтааст
РАҚАМИКУНОНӢ. Маркази тамос барои хизматрасонӣ ба нафақагирон тавассути рақами кутоҳи 3900 фаъол гардид
ТАҒЙИРЁБИИ ИҚЛИМ. Чӣ гуна худ ва атрофиёнро аз чангу ғубор муҳофизат намоем?
МАСЛИҲАТИ МУТАХАССИС. Барои фоиданокӣ қаламфури булғориро бе коркард, дар шакли тару тоза истифода баред
Дар шаҳри Бӯстон сохтмони корхонаи муосири забҳи парранда идома дорад
Имрӯз дар Тоҷикистон чангу ғубор ба амал меояд
Бо гузашти 28 сол аҳамияти Ваҳдати миллӣ дар рушди иқтисодии Тоҷикистон бештар эҳсос мешавад
Фаъолияти иҷтимоӣ ва фарҳангӣ яке аз воситаҳои муассири таҳкими ваҳдати миллӣ мебошад
Муовини Раиси ноҳияи Данғара Зуҳро Ҳакимзода: «Мардум ба Пешвои миллат боварӣ ва эътимод дорад»
Тоҷикистон дар партави ваҳдати миллӣ ба сӯи шукуфоии нав қадам мегузорад
ВАҲДАТИ МИЛЛӢ — ПОЯИ ҲАСТИИ ДАВЛАТ ВА НЕРУИ СОЗАНДАИ МИЛЛАТ. Мулоҳизаҳои ректори Донишгоҳи давлатии Кӯлоб