ИСТАРАВШАН-МАСКАНИ ЁДГОРИҲОИ ТАЪРИХӢ. Найтхарт Хёфер-Виссинг аз Қалъаи Муғ дидан намуд

ДУШАНБЕ, 05.06.2018 /АМИТ «Ховар»/. Дар шаҳри Истаравшан зиёда аз 150 адад ёдгориҳои таърихӣ мавҷуд мебошанд, ки онҳо метавонанд барои ҷалби сайёҳони хориҷӣ мусоидат кунанд.

Ин нукта зимни мулоқоти раиси шаҳри Истаравшан Баҳром Иноятзода бо Сафири Фавқулода ва Мухтори Ҷумҳурии Федеративии Германия дар Ҷумҳурии Тоҷикистон Найтхарт Хёфер – Виссинг, ки бо сафари корӣ дар Истаравшан қарор дошт, баён гардид.

Тавре аз хадамоти матбуоти вилояти Суғд ба АМИТ «Ховар» хабар доданд, ҷонибҳо зимни суҳбат доир ба масъалаҳои сохтмону тандурустӣ, сармоягузорӣ, сайёҳӣ ва табодули таҷрибаи мутахассисони соҳаҳои гуногун гуфтушунид намуданд.

Таваҷҷуҳи асосӣ дар масъалаи ҷалби сайёҳони Германия ба шаҳри Истаравшан равона карда шуд.

Найтхарт Хёфер – Виссинг бо ҷараёни корҳои барқарорсозӣ ва бунёди Амфитеатр дар Маҷмааи меъмориву таърихии «Қалъаи Муғ» шинос гардид.