Сергей Лебедев ба ташкил ва натиҷаҳои ҷаласаи Шӯрои сарони ҳукуматҳои ИДМ дар Душанбе баҳои баланд дод

ДУШАНБЕ, 01.06.2018 /АМИТ «Ховар»/. Раиси Кумитаи иҷроия-котиби иҷроияи ИДМ Сергей Лебедев дар изҳороти матбуотӣ ба ташкил ва натиҷаҳои ҷаласаи Шӯрои сарони ҳукуматҳои ИДМ, ки 1 июн дар шаҳри Душанбе доир гардид, баҳои баланд дод. Дар ҷаласа аз 11 давлати узви ИДМ намояндаи 10 кишвар, аз ҷумла,  шаш раиси ҳукумат ва се муовини раиси ҳукумат иштирок доштанд. 

Сергей Лебедов саҳми шахсии Президенти Ҷумҳурии Тоҷикистон  муҳтарам Эмомалӣ Раҳмонро дар доир намудани чунин ҳамоиши сатҳи баланд махсус таъкид намуда, зикр кард, ки «меҳмондории самимии тоҷиконро иштирокдорони ҷаласаи Шӯрои сарони ҳукуматҳои ИДМ дар дақиқаи аввали ташриф ба Душанбе эҳсос намуданд».

«Вохӯрии ғайрирасмии Президенти Ҷумҳурии Тоҷикистон бо роҳбарони ҳукуматҳо ва ҳайатҳо, ки  дирӯз баргузор гардид, аз таваҷҷуҳи махсуси муҳтарам Эмомалӣ Раҳмон ба ҷаласаи мазкур шаҳодат медиҳад», -гуфт С. Лебедов.

С. Лебедов аз муносибатҳои хуби ҳамсоягии Тоҷикистону Ӯзбекистон ёдовар шуда, гуфт, ки мо бояд бо ҳамсояҳои худ дӯстӣ кунем. Таъкид шуд, ки дар баробари масъалаҳои рӯзнома дар ҷаласа инчунин муносибатҳои хуби ҳамсоягии кишварҳои ИДМ баррасӣ шуданд.