Чаро шаҳрвандон бештар ба ҳокимияти судӣ муроҷиат менамоянд?

ВАҲДАТ, 18.07.2018. /АМИТ «Ховар»/. Суди шаҳри Ваҳдат соли равон 2549 адад парвандаҳои ҷиноятӣ, гражданӣ, оилавӣ ва маъмуриро баррасӣ намуд, ки нисбат ба ҳамин давраи соли гузашта 197 парванда зиёд аст.

Тибқи иттилои Раиси Суди шаҳри Ваҳдат Сайфиддин Камолзода, аз парвандаҳои баррасишуда 987 адад парвандаи оилавӣ ва 775 адад парвандаҳои маъмурӣ мебошанд.

Ба андешаи масъулин, яке аз сабабҳои бештар ба  ҳокимияти судӣ муроҷиат намудани шаҳрвандон — ин баланд гардидани маърифати ҳуқуқии онҳо мебошад, ки ба адолати судӣ бовар намуда, мехоҳанд мушкилоташон бартараф гардад.

Сайфиддин Камолзода мегӯяд, ки сабаби асосии зиёд ба қайд гирифтани парвандаҳои оилавӣ — ин аз ҳам ҷудо гардидани оилаҳои ҷавон  ва муроҷиати занон барои гирифтани алименти кӯдаконашон мебошад.

Ҳамчунин имсол бо кӯшишу маслиҳати судманди судяҳо зимни  баррасии парвандаҳои оилавӣ  се оилаи ҷавон барқарор гардиданд.