ЭҲДО БА ҶАШНИ 30-СОЛАГИИ ИСТИҚЛОЛИЯТ. Дар шаҳри Роғун 4 коргоҳи ҳунармандӣ ва муассисаи таълимӣ бунёд мегарданд

РОҒУН, 16.07.2018. /АМИТ «Ховар»/. Бахшида ба Соли рушди сайёҳӣ ва ҳунарҳои мардумӣ ва омодагӣ ба ҷашни 30-солагии Истиқлолияти давлатии Ҷумҳурии Тоҷикистон дар шаҳри Роғун 13 нуқтаи фурӯши ҳунарҳои мардумӣ  ташкил гардид. Барои зебою дилрабо гардидани маркази шаҳр гӯшаю овезаҳои тарғиботӣ насб намуда, гулгашту майдончаҳои варзишӣ сохтанд. Ҳар рӯзи шанбе барои сокинони шаҳр ярмаркаҳои фурӯши маҳсулоти кишоварзӣ бо нархҳои дастрас  ташкил мешаванд. Ин нуктаро раиси шаҳри Роғун Иброҳими Билол 14 июл зимни нишасти матбуотӣ иброз намуд.

Дар нишаст зикр гардид, ки дар доираи омодагиҳо ба ҷашни 30-солагии Истиқлолияти давлатӣ аз ҳисоби маблағҳои буҷети маҳаллӣ дар деҳаи Қандаки шаҳри Роғун муассисаи таълимӣ барои 520 хонанда ва аз ҳисоби соҳибкорону ҳунармандон майдончаҳои варзишӣ, синфхонаҳои иловагӣ, бинои ҳаммом ва сартарошхона дар маҳаллаи Майдони нав, ду майдончаи бозии кӯдакон дар маҳаллаи 25-солагии Истиқлолияти шаҳри Роғун бунёд шуда, роҳи маҳаллаи Истиқлол-Норакиён навсозӣ ва роҳи деҳаи Ҷавонӣ таъмири ҷорӣ мешаванд.

Зикр гардид, ки то таҷлили ин ҷашни муҳими давлатӣ дар шаҳр инчунин 4 коргоҳи истеҳсоли ҳунарҳои мардумӣ, аз қабили табақтарошӣ, оҳангарӣ ва дӯзандагию бофандагӣ мавриди истифода қарор мегиранд.

Бояд гуфт, ки ду адади он дар шафати шоҳроҳи байналмилалии Ваҳдат- Лахш ҷойгир мешаванд.