Федератсияи футболи Тоҷикистон дар маҳаллаи Хоруғи боло майдончаи замонавӣ бунёд мекунад

ХОРУҒ, 10.07.2018 /АМИТ «Ховар»/. Федератсияи футболи Тоҷикистон барои кӯдакону наврасон ва ҷавонони маҳаллаи Хоруғи боло майдони  футболи хурд бунёд мекунад. Ин майдони хурд мутобиқ ба талаботи  меъёрҳои байналмилалии иншооти варзишӣ сохта мешавад.

Раиси бахши Федератсияи футбол дар Вилояти Мухтори Кӯҳистони Бадахшон Аноятшо Аноятшоев ба масъулини Федератсияи футболи Тоҷикистон ва Раиси он Рустами Эмомалӣ изҳори сипос намуда, гуфт, ки   қаблан низ дар ҳудуди вилоят чунин майдонҳо бунёд шуда буданд-яке  дар маркази ноҳияи Дарвоз ва дуюм дар Ҷамоати деҳоти Сағирдашти ин ноҳия.

Мутахассиси Федератсияи футболи Тоҷикистон  оид ба сохтмони майдонҳои сунъӣ Темуралӣ Алиев гуфт, ки дар бунёди ин майдон тамоми меъёрҳои муосири сохтмонӣ ба назар гирифта шудаанд. Шояд баъзеҳо чунин суол гузоранд, ки оё ин майдон ба иқлими сард, барфу боронгариҳои шадиди вилояти Бадахшон тоб оварда метавонад?

Темуралӣ Алиев посух гардонд, ки «чунин майдонро чанд сол пеш дар Ҷамоати Сағирдашт, яке аз мавзеъҳои сард ва сербарфи ҷумҳурӣ сохта буданд ва бо гузашти солҳо заррае сифати он коста нагаштааст. Дар зери  сабзаи сунъӣ  қубурҳо гузошта шудаанд, ки тавассути ин қубурҳо оби барфу борон берун аз майдон партофта мешавад. Масолеҳи сохтмонӣ  аз кишварҳои Туркия ва Россия дастрас гардидааст».

Масъули сохтмони ин майдон Темуралӣ Алиев аз кумаку дастгирии беғаразонаи  ҷавонони маҳаллаи Хоруғи боло изҳори хушҳолӣ карда, гуфт, ки «агар ҳамин гуна  ҳамкорию дастгирӣ аз сӯи  ҷавонони маҳаллаҳои дигари шаҳр  сурат бигирад, мо омода ҳастем барои онҳо низ дар оянда чунин майдонҳои зебову замонавӣ бунёд намоем».