Лука Модрич беҳтарин футболбози Аврупо эълон гардид

ДУШАНБЕ, 31.08.2018. /АМИТ «Ховар»/. Шоми гузашта дар шаҳри Монакои Франсия ниммуҳофизатгари хорватии клуби шоҳонаи «Реал»-и Мадрид ва дастаи мунтахаби Хорватия Лука Модрич беҳтарин футболбози УЕФА дар мавсими футболи 2017-2018 эълон гардид.

Дар ин бора Созмони Хадамоти матбуоти Федартсияи футболи Аврупо хабар медиҳад. Барои унвони беҳтарин футболбози Аврупо ба ғайр аз  Модрич, инчунин Муҳаммад Салоҳ («Ливерпул» ва дастаи мунтахаби Миср) ва Криштиану Роналду («Реал», «Ювентус» ва дастаи мунтахаби Португалия) низ даъвогар буданд.

Лука Модрич бо «Реал» мавсими гузашта соҳиби Ҷоми Лигаи чемпионҳо ва бо дастаи мунтахаби Хорватия соҳиби медалҳои нуқраи Чемпионати ҷаҳон гардида буд. Ба замми ин, Модрич ба ҳайси беҳтарин бозингари Чемпионати ҷаҳони соли 2018 дар Россия интихоб шуд.