ФУТБОЛ: дастаи мунтахаби ҷавонони Тоҷикистон бо дастаи Чин бозиро мусовӣ анҷом дод

ДУШАНБЕ,7.09.2018 /АМИТ «Ховар»/. Шоми дирӯз дастаи мунтахаби  ҷавонони то  21-солаи Тоҷикистон таҳти роҳбарии сармураббӣ Мубин Эргашев бозии дуюмашро дар мусобиқаи байналмилалӣ бо дастаи     мунтахаби ҷавонони то  21-солаи Чин бо ҳисоби мусовии 1:1 анҷом дод.

Тавре аз Федератсияи футболи Тоҷикистон ба хабарнигори АМИТ «Ховар» иттилоъ доданд, дар   ин бозии ҷолиб, ки   дар шаҳри Тсюйтсзини Чин баргузор шуд, ҳисобро дар дақиқаи 42-юм нимҳимоятгари дастаи мунтахаби ҷавонони Тоҷикистон Муҳаммадҷон Раҳимов боз кард. Дар дақиқаи 69-ум мизбонон ҳисобро баробар намуданд.

Дар бозии дигари даври дуюм дастаи  мунтахаби ҷавонони Ӯзбекистон   бар дастаи  мунтахаби  ҷавонони Мянмар   бо ҳисоби 2:0 ғолиб омад.

Ёдовар мешавем, ки футболбозони ҷавони тоҷик дар аввалин бозиашон дар мусобиқаи байналмилалӣ дар Чин, ки 4  сентябр баргузор шуд, аз дастаи мунтахаби  ҷавонони Ӯзбекистон   бо ҳисоби 0:1 мағлуб гашта буданд.

Хотиррасон менамоем, ки  дастаи  мунтахаби ҷавонони Тоҷикистон   бозии сеюмашро дар мусобиқаи байналмилалӣ дар Чин 8  сентябр бо  дастаи мунтахаби ҷавонони  Мянмар анҷом медиҳад.

Бояд зикр кард, ки ширкат дар ин мусобиқаи байналмилалӣ барои дастаи  мунтахаби ҷавонони Тоҷикистон   давраи омодагӣ  ба марҳалаи интихобии Чемпионати Осиё-2020, ки аз 18 то 26 марти соли оянда доир мегардад, маҳсуб мешавад.