Кормандони гумруки Тоҷикистон садди роҳи паҳн гардидани моддаҳои психотропӣ шуданд

ДУШАНБЕ, 21.09.2018. /АМИТ «Ховар»/. Аз ҷониби кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон дар ҷараёни гузаронидани маҷмӯи чорабиниҳои фаврӣ-ҷустуҷӯйӣ дар маҳаллаи Гипроземи ноҳияи Синои шаҳри Душанбе шаҳрванди Ҷумҳурии Тоҷикистон Гулов Хуршед Саломович, соли таваллудаш 1964, зода ва истиқоматкунандаи шаҳри Душанбе, қаблан судшуда, бо гумони даст доштан дар ҷиноятҳои марбут ба муомилоти ғайриқонунии воситаҳои нашъаовар дастгир карда шуд.

 Тавре аз маркази матбуоти Хадамоти гумруки назди Ҳукумати Ҷумҳурии Тоҷикистон ба мухбири АМИТ «Ховар» хабар доданд, зимни кофтукови шахсии дастгиршуда аз ӯ ба миқдори 1395 дона маводи рангашон хокистарранг ва кабудча дар намуди ҳабҳо дарёфт гардид.

Мувофиқи маълумотномаи Раёсати ташхисӣ-криминалистии Вазорати корҳои дохилии Ҷумҳурии Тоҷикистон, маводи мусодирашуда моддаҳои психотропии «МДМА» буда, вазни умумияшон 472 граммро ташкил дод.

Дар ҷараёни гузаронидани маҷмӯи чорабиниҳои фаврӣ-ҷустуҷӯйӣ дар вилояти Суғд дигар иштирокчии ҷинояти мазкур, шаҳрванд Гулов Толибҷон Хуршедович, соли таваллудаш 1998, зода ва истиқоматкунандаи шаҳри Душанбе, ноҳияи Сино, кӯчаи Навбаҳор 1/1 ҳуҷраи 9 дастгир карда шуд.

Бо ин кирдорҳояшон шаҳрвандони номбурда ҷинояти дар моддаи 200 қисми 4-и Кодекси Ҷиноятии Ҷумҳурии Тоҷикистон пешбинишударо содир намудаанд.

Нисбат ба онҳо парвандаҳои ҷиноятӣ оғоз гардида, дар Раёсати тафтишоти Вазорати корҳои дохилии Ҷумҳурии Тоҷикистон қарор доранд.