Пешвои миллат: «Барномаи рушди иҷтимоию иқтисодии ноҳияи Мурғоб барои солҳои 2016-2020» 121 лоиҳаро ба маблағи умумии 214 миллион сомонӣ дарбар мегирад»

ДУШАНБЕ, 14.98.2018. /АМИТ «Ховар»/. Президенти мамлакат муҳтарам  Эмомалӣ Раҳмон дирӯз зимни суханронӣ дар мулоқот бо сокинони ноҳияи Мурғоби Вилояти Мухтори Кӯҳистони Бадахшон  аз заҳматдӯстиву қавииродагӣ  ва мушкилнописандии  мардуми диёри баландкӯҳи Мурғоб, ки ҳамеша барои беҳтар шудани шароити рӯзгору ободии маҳалли зист, пешрафти ноҳияи худ саъю талош  ва дар фазои ваҳдату дӯстӣ,  ҳамдигарфаҳмиву сарҷамъӣ фаъолият мекунанд, изҳори  хушнудӣ  намуданд.

Сарвари давлат ҳамзамон  хотиррасон шуданд, ки «дар тӯли  27  соли истиқлолият дар ноҳияи Мурғоб аз ҳисоби сарчашмаҳои гуногун ба маблағи умумии 284 миллион сомонӣ зиёда аз 140 иншооти иҷтимоиву иқтисодӣ ва инфрасохторӣ бунёду навсозӣ ва мавриди истифода қарор дода шудаанд, ки   70 фоизи маблағҳои азхудшуда танҳо ба се соли охир рост меояд. Тибқи қарори Ҳукумати Тоҷикистон «Дар бораи тадбирҳои аввалиндараҷаи беҳтар намудани вазъи иҷтимоиву иқтисодии ноҳияи Мурғоби Вилояти Мухтори Кӯҳистони Бадахшон дар солҳои 2005-2009», барои таъмини аҳолии ноҳия бо молҳои ниёзи аввалия, муассисаҳои иҷтимоӣ бо ангиштсанг, муассисаҳои таълимӣ бо ҷойи нишасти иловагӣ ва маводи хониш 14 миллион сомонӣ равона карда шудааст».

Роҳбари давлат  иброз доштанд,  ки  тибқи «Барномаи рушди соҳаи қутоспарварӣ дар Ҷумҳурии Тоҷикистон барои солҳои 2008-2015» аз ноҳияи Мурғоб зиёда аз 1600 сар қутос харидорӣ карда шуда, ба ин мақсад аз буҷети давлатӣ ва аз ҳисоби сармоягузорон 2,5  миллион сомонӣ равона гардидааст.

Пешвои миллат ёдовар шуданд, ки дар «Барномаи давлатии омӯзиш ва арзёбии захираҳои металлҳои нодир барои солҳои 2016-2026» иҷрои корҳои ҷустуҷӯиву арзёбӣ дар зуҳуроти кони Ясногор пешбинӣ гардида, ба ин мақсад аз буҷети давлатӣ зиёда аз 8 миллион сомонӣ ба нақша гирифта шудааст. Ҳамчунин дар доираи «Барномаи давлатии рушди соҳаи геологияи Ҷумҳурии Тоҷикистон барои солҳои 2012-2020» корҳои ҷустуҷӯиву арзёбӣ дар зуҳуроти титани Башгумбез, Барфӣ ва кони флюорити Чамбой ба нақша гирифта шудаанд.

«Танҳо дар панҷ соли охир аз ҳисоби буҷети давлат барои дастгирии буҷети ноҳия 115 миллион сомонӣ маблағ равона гардида, ҷиҳати амалисозии лоиҳаҳои сармоягузорӣ дар самти бунёди иншооти энергетикиву коммуникатсионӣ ва саноатӣ қариб 200 миллион сомонӣ аз худ карда шудааст. Илова бар ин, қариб нисфи маблағҳои дар доираи татбиқи Барномаи рушди иҷтимоию иқтисодии ноҳияи Мурғоб барои солҳои 2016-2020 азхудшударо, ки 121 лоиҳаро ба маблағи умумии 214 миллион сомонӣ дар бар мегирад, маблағҳои буҷети давлатӣ, лоиҳаҳои давлатии сармоягузорӣ ва сармояи хориҷӣ ташкил медиҳанд. Дар зарфи дуюним соли татбиқи барнома 11 иншооти нав ба истифода супорида шуда, дар 17 иншоот ба маблағи 18 миллион сомонӣ корҳои бунёдкорӣ бомаром идома доранд», —  афзуданд Президенти мамлакат.

Сарвари давлат таъкид намуданд, ки «ҳукумати кишвар барои рушди минбаъдаи инфрасохтори иҷтимоиву коммуникатсионӣ, пешрафти соҳаҳои кишоварзиву саноат ва баланд бардоштани сатҳу сифати зиндагии аҳолии ноҳияи Мурғоб маблағгузории буҷетиро тибқи барномаҳои гуногуни соҳавӣ мунтазам афзоиш дода истодааст».