Мулоқоти Сарвазири Тоҷикистон Қоҳир Расулзода бо Сарвазири Ҷумҳурии Қирғизистон Мухаммедкали Абилгазиев

ДУШАНБЕ, 11.10.2018. /АМИТ «Ховар»/. Имрўз  мулоқоти Сарвазири мамлакат Қоҳир Расулзода  бо Сарвазири Ҷумҳурии  Қирғизистон Мухаммедкали Абилгазиев, ки барои иштирок дар дар кори ҷаласаи навбатии Шўрои Сарони Ҳукуматҳо-Сарвазирони давлатҳои аъзои Созмони Ҳамкории Шанхай ба Душанбе ташриф овардааст, баргузор шуд.

Ҷонибҳо дар мулоқот масоили рушду тавсеаи ҳамкории байниҳукуматии Тоҷикистон ва Қирғизистонро ҳам дар асоси дуҷониба ва ҳам дар доираи узвият дар Созмони Ҳамкории Шанхай ва дигар ташкилоту созмонҳои минтақавию байналмилалӣ  баррасӣ намуданд.

Доир ба таҳкими ҳамкории байниҳукуматии Тоҷикистон ва Қирғизистон дар соҳаҳои тиҷорату иқтисод, энергетика,истифодаи захираҳои об,  инфрасохтори роҳу нақлиёт,  кишоварзӣ, илму техника, маориф ва фарҳанг, таҳкими кори комиссияҳои муштараки байниҳукуматӣ оид ба масъалаҳои тиҷоратию иқтисодӣ ва марзи байнидавлатӣ, ҳамчунин густариши ҳамкориҳои байниҳамдигарии минтақаҳои  наздисарҳадӣ  низ табодули афкори судманд доир гардид.