«ТИЛЛОИ САФЕД»– БА ВАТАН! Дар майдонҳои пахтаи вилояти Суғд 60 рӯзи меҳнати зарбдор эълон гардид

ХУҶАНД, 02.10.2018 /АМИТ «Ховар»/.  Беш аз 20 рӯз мешавад, ки дар ҳафт ноҳияи пахтакори вилояти Суғд чиниши пахта муташаккилона идома дорад. Тибқи маълумоти раёсати кишоварзии вилоят, то 1 октябри соли равон пахтакорони вилоят 49254,9 тонна пахта ҷамъоварӣ намудаанд, ки ин ба 37,9 фоизи нақшаи солона баробар аст.

Бино ба иттилои хабарнигори АМИТ «Ховар», дар маркази маъмурии Суғд- назди майдони «Ситораҳои Хуҷанд»-и шаҳр бо иштироки раиси вилояти Суғд Раҷаббой Аҳмадзода ҷамъбасти давраи аввали 20- рӯзаи мусобиқаи меҳнатӣ байни ноҳияҳо ва хоҷагиҳои пахтакори вилоят дар мавсими имсолаи ҷамъоварии ҳосили пахта доир гардид.

Тибқи иттилои манбаъ, дар 20-рӯзаи аввали пахтачинӣ дар сегонаи пешқадам пахтакорони шаҳри Конибодом (51,9%) ва ноҳияҳои Мастчоҳу (44,2%) Бобоҷон Ғафуров (42,6) қарор дошта, дар байни ҷамоатҳо Ҷамоати шаҳраки Суғдиёни ноҳияи Мастчоҳ беҳтарин дониста шуданд.

Ҳамзамон зикр гардид, ки соли ҷорӣ бо назардошти аҳамияти стратегӣ доштани пахта майдони умумии он дар вилоят қариб 7 ҳазор гектар зиёд карда шуда,  соли равон истеҳсоли 130 000 тонна пахта дар назар аст.

Раҷаббой Аҳмадзода пешниҳод намуд, ки баҳри сари вақту беталаф ҷамъоварӣ намудани «тиллои сафед» дар майдонҳои пахтаи вилоят 60 рӯзи меҳнати зарбдор эълон карда шавад.

Сипас, дар вазъияти тантанавӣ ба шарафи ғолибон «Парчами шараф» барафрохта шуда, ба онҳо мукофотҳои пулӣ ва туҳфаҳои хотиравӣ супорида шуданд.