Сокини ноҳияи Лахш аз ҳисоби маъракаи «чил»-и модараш роҳи дохили деҳаи Сасибулоқро сангфарш ва чароғон намуд

ЛАХШ, 26.11.2018 /АМИТ «Ховар»/. Боиси қаноатмандист, ки  аксарияти мардуми ноҳияи Лахш сол то сол аз баъзе урфу одатҳои хурофотии зараровар, мисли  маъракаҳои  пурдабдабаю намоишкорона  даст кашида,  маблағи ин хароҷоти беҳударо дар корҳои ободонӣ ва дастгирии ятимону  муҳтоҷон сарф  менамоянд.

Ин анъана  бештар аз тарафи сокинони ҷамоатҳои шаҳраку деҳоти Ваҳдат, Ҷиргатол, Янгишаҳр, Сартало, Қашот, Лахш, Муксу, Алға  ҳамаҷониба дастгирӣ ёфта, роҳу кӯчаҳои маркази ин деҳаҳо бо ҳамин усул ҳамвор ва чароғон гардонида,  синфхонаҳои нав бунёд ва баъзе биноҳои таълимӣ  таъмиру навсозӣ шуданд.

Давоми сол бо мақсади вусъат бахшидан ба корҳои созандагию бунёдкорӣ ва тозаю озода нигоҳ доштани кӯчаю роҳҳои мошингарди дохили деҳаҳои Ҷамоати деҳоти Муксу дар доираи чорабиниҳо баҳри омодагӣ ба ҷашни 30-солагии Истиқлолияти давлатии Ҷумҳурии Тоҷикистон ва иҷрои дастуру супоришҳои Пешвои милла, муҳтарам Эмомалӣ Раҳмон ва кӯшишу талошҳои бевоситаи раиси Ҷамоати деҳоти Муксу Ботурбек Ғаниев як қатор корҳои ободонӣ, ба монанди шағалрезию  ҳамворкунии роҳҳо,  шинондани чароғакҳои равшанкунанда дар кӯчаю хиёбонҳои деҳаҳо бо саҳмгузории шахсони ватандӯсту сахӣ  ба ҷо оварда  шуда истодаанд.

Тибқи иттилои раиси ҷамоат Ботурбек Ғаниев,  дар ин кори хайр сараввал сокини деҳаи Сасибулоқ Нисратулло Латипов саҳм гузошт. Ӯ бо 6790 сомонӣ маблағе, ки  бояд барои маъракаи «чил»-и модараш сарф мекард, як километру 320 метр роҳи дохили  деҳаи Сасибулоқро шағалпӯш намуд. Инчунин бо маблағи 590 сомонӣ 11 чароғаки равшанкунандаи барқиро ба симчӯбҳои маркази деҳаи Сасибулоқ васл кард.

Ҳамин тариқ, сокинони ҳамин ҷамоат Исроил Хашеков, Муҳриддин Ҳайдаров, Зайдулло Маҳмадов ва Деҳқон Саидов  аз ҳисоби маросимҳои «чил»-у «сари сол»-и падару модаронашон дар сангфаршкунии роҳҳои маҳаллӣ ва сохтмони беморхонаи минтақавӣ дар деҳаи Сарикенҷа саҳм гузоштанд. Ин иқдоми ашхоси номбурда шаҳодат аз он медиҳад, ки сокинони ҷамоатҳои шаҳраку деҳоти ноҳияи Лахш баҳри татбиқи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» саҳми худро мегузоранд ва барои ободию шукуфоии ватани азизамон талош меварзанд.

Сардори Муассисаи давлатии нигоҳдории роҳҳои автомобилгарди ноҳияи Лахш Музафар Маҳмудов гуфт, ки «сокинони ноҳия бо дарки масъулияти ватанпарварона ва пайравӣ аз сиёсати хирадмандонаи  Пешвои миллат муҳтарам Эмомалӣ Раҳмон  даст ба амалҳои хайр зада, маблағҳоро аз ҳисоби гузаронидани тӯю маъракаҳо  ва ҷашну маросимҳо сарфа намуда, дар доираи  татбиқи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон»  барои таъмиру таҷдиди роҳҳои дорои аҳамияти маҳаллӣ ва дохили деҳаҳо равона намуда истодаанд. То имрӯз бо кумаки техникии Муассисаи мазкур ва саҳми сокинони саховатпеша  27 км роҳҳои дорои аҳамияти маҳаллӣ ва 11 км роҳҳои ҷумҳуриявиро  таъмир намудем. Ҳамчунин бо истифода аз қувваи сокинон  ва техникаву механизмҳои муассиса роҳи маркази Ҷамоати деҳоти Қашот  дар масофаи 2 км мумфарш карда шуд».