Дастаи футболи «ОРЗУ-2026» ғолиби Ҷоми Ислом Маҳмадшоев гардид

ДУШАНБЕ, 12.12.2018 /АМИТ «Ховар»/. Дастаи наврасони «Орзу-2026»-и Академияи ФФТ дар бозии финалӣ дастаи футболи  вилояти Хатлонро бо ҳисоби 1:0  мағлуб намуда, соҳиби Ҷом гардид.

Дар ин бора ба мухбири   АМИТ «Ховар»  аз Федератсияи футболи Тоҷикистон хабар доданд. Зикр шуд, ки даври ниҳоии мусобиқа дар майдони захиравии Варзишгоҳи марказии  шаҳри Душанбе доир гардид.  Дар  ин вохӯрии  ҷолиб  голи ягонаро футболбози   дастаи  «Орзу-2026» Алинур Ниёзбеков вориди дарвозаи ҳариф намуд.

Хотиррасон менамоем, ки мусобиқаи ҷумҳуриявӣ оид ба футбол байни наврасони соли таваллудашон 2001-2002 ба гиромидошти хотираи собиқ котиби генералии ФФТ Ислом Маҳмадшоев бахшида шуд.

Дар ҷамъбасти мусобиқа ноиби ФФТ Алишер Урунов, директори генералии Лигаи футболи кӯдакону наврасон Увайдо Давлатбеков, намояндаи Кумитаи кор бо ҷавонон ва варзиш Абдулло Маҳмадализода ва сармураббии  дастаи футболи «Истиқлол»-и Душанбе Ҳаким Фузайлов ва дигар намояндагони футболи кишвар иштирок намуда, ба ғолибон ҷоизаву медалҳоро тақдим намуданд.