Дастаи мунтахаби ҷавонони Тоҷикистон ба даври финалии Чемпионати Осиё-2019 роҳ ёфт

ДУШАНБЕ,11.12.2018 /АМИТ «Ховар»/. Дастаи мунтахаби  ҷавонони то 20-солаи Тоҷикистон оид ба футзал ба даври ниҳоии Чемпионати Осиё-2019, ки соли оянда дар Эрон баргузор мегардад, роҳхат гирифт.

Дар ин бора ба мухбири  АМИТ «Ховар»  аз Федератсияи футболи Тоҷикистон хабар доданд. Зикр шуд, ки пас аз натиҷагирии марҳилаи интихобии Чемпионати Осиё-2019 дастаҳои футболи толории Қирғизистон, Афғонистон, Тоҷикистон аз минтақаи Осиёи Марказӣ, Лубнон, Ироқ, Арабистони Саудӣ аз минтақаи Ғарб, Япония, Тайпейи Чин аз минтақаи Шарқ, Тайланд, Ветнам ва Индонезия аз минтақаи Уқёнус ҳаққи иштирок дар марҳилаи финалии чемпионатро пайдо намуданд.

Ёдовар мешавем, ки  дастаи мунтахаби ҷавонони  Эрон ҳамчун мизбони марҳилаи финалӣ дар марҳилаи интихобӣ ба инобат гирифта намешавад.

Бояд зикр кард, ки  дар 2-юмин  Чемпионати Осиё миёни ҷавонон оид ба футболи толорӣ, ки соли оянда дар Эрон доир мегардад, 12 даста иштирок мекунанд. Дастаҳо тибқи қуръакашӣ ба се гурӯҳи 4-дастаӣ тақсим мешаванд.