Футболбозони то 14-солаи Тоҷикистон ба бозиҳои интихобии Чемпионати Осиё омода мешаванд
![](https://khovar.tj/wp-content/uploads/2018/12/Novyj-risunok-32.jpg)
ДУШАНБЕ, 18.12.2018. /АМИТ «Ховар»/. Дастаи мунтахаби то 14-солаи Тоҷикистон оид ба футбол ба бозиҳои интихобии Чемпионати Осиё омода мешавад. Аввалин давраи машқҳоро футболбозони тоҷик дар шаҳри Тошканди Ҷумҳурии Ӯзбекистон ба анҷом расониданд.
Бозиҳои интихобии Чемпионати Осиё байни футболбозони то 14-сола моҳи сентябри соли 2019 оғоз шуда, баргузории бозиҳои ниҳоии он соли 2020 дар назар аст. Бо мақсади тайёрии хуб ба ин мусобиқаи бонуфуз Федератсияи футболи Тоҷикистон аз ҳоло таваҷҷуҳро ба омодагии хуби футболбозон равона карда, баҳри таҷрибаандӯзи онҳоро ба шаҳри Тошканди Ҷумҳурии Ӯзбекистон равона кард.
Футболбозони мо аз 10 то 16 декабр дар баробари тамринҳо се бозии таҷрибавию дӯстонаи худро бо дастаҳои “Спартак” (4:1), “Пахтакор” (1:1) ва Академияи “Бунёдкор” (1:3) доир карда, бо як ғалаба, як мусовӣ ва як бохт ба Душанбе баргаштанд.
Тайёрии дастаи мунтахаби наврасони то 14-солаи Тоҷикистон баъди соли нав идома меёбад.