Футзалбозони ҷавони тоҷик бар дастаи мунтахаби Ӯзбекистон пирӯз гардиданд

ДУШАНБЕ, 04.12.2018 /АМИТ «Ховар»/. Дастаи мунтахаби ҷавонони то 20-солаи Тоҷикистон оид ба футзал дар даври дуюми бозиҳои интихобии Чемпионати Осиё-2019 дар Минтақаи марказӣ дар гурӯҳи «В» бо ҳисоби калони 7:2 дастаи мунтахаби  Ӯзбекистонро мағлуб намуда, роҳхати марҳилаи навбатиро ба даст овард.

Дар ин бора ба мухбири  АМИТ «Ховар»  аз Федератсияи футболи Тоҷикистон хабар доданд. Дар ин вохӯрии ҷолиб голҳоро аз дастаи мунтахаби Тоҷикистон Муҳаммад Раҷабов, Идрис Ёров, Фаридун Неъматов ва Халид Сабуров ба нишон расониданд.

Ҳамин тариқ, дастаи  мунтахаби ҷавонони Тоҷикистон имрӯз дар даври плей-офф бо дастаи  мунтахаби  Афғонистон, ки дар гурӯҳи «А» мақоми дуюмро ишғол мекунад, рақобат менамояд.

Баргузории бозии мазкур дар маҷамааи варзишии «Ӯзбекистон» дар шаҳри Тошканд соати 13:00 дар назар аст. Ғолибият дар ин бозӣ иштироки дастаи  мунтахаби ҷавонони Тоҷикистонро дар Чемпионати Осиё, ки соли оянда баргузор мешавад, таъмин месозад.