Сафири навтаъйини Ҷумҳурии Мардумии Чин ба Душанбе омад

ДУШАНБЕ, 10.12.2018 /АМИТ «Ховар»/. 10 декабри соли 2018  Вазири корҳои хориҷии Ҷумҳурии Тоҷикистон Сироҷиддин Муҳриддин нусхаи эътимодномаи Сафири навтаъйини Фавқулода  ва  Мухтори Ҷумҳурии Мардумии  Чин Лю Бинро қабул кард.  

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар мулоқот ҷонибҳо вазъи кунунӣ ва дурнамои наздики ҳамкории  мутақобилан судманди ду кишвари ҳамҷавору дӯст ва шарики стратегиро  дар бахшҳои сиёсӣ, иқтисодиву тиҷоратӣ, энергетика, нақлиёт,  саноат, маориф, илмӣ-техникӣ ва фарҳангиву гуманитарӣ мавриди баррасӣ қарор доданд.

Ҷонибҳо инчунин доир ба ҳамкории ду кишвар дар доираи созмонҳои байналмилалӣ ва минтақавӣ, аз ҷумла СММ, ШОС, МҲТБО ва ғайра табодули афкор намуданд.

Вазири корҳои хориҷии Ҷумҳурии Тоҷикистон Лю Бинро  ба муносибати Сафири Фавқулода  ва  Мухтори Ҷумҳурии  Мардумии  Чин дар Ҷумҳурии Тоҷикистон таъйин шуданаш  табрик  намуда,  барояш комёбӣ ва  ба  кишвари дӯсти Чин шукуфоӣ таманно кард.