Бозии таҷрибавии КФ «Истиқлол» бо дастаи мунтахаби олимпӣ ба ҳисоби калон анҷом ёфт

ДУШАНБЕ, 09.01.2018. /АМИТ «Ховар»/. Дар Варзишгоҳи марказии пойтахт бозии таҷрибавии КФ «Истиқлол» бо дастаи мунтахаби олимпии Тоҷикистон бо ҳисоби калони 4:1 ба манфиати истиқлолиҳо анҷом ёфт. Аловиддин БӮРИЕВ   шарҳ медиҳад.

Ду дастаи футболи мамлакат- «Истиқлол»-и Душанбе ва дастаи мунтахаби олимпии Тоҷикистон, ки яке дар бозиҳои интихобии Лигаи чемпионҳои Осиё ва дигаре дар бозиҳои интихобии Чемпионати ин қитъа шарафи ҷумҳурии моро моҳҳои наздик ҳимоя мекунанд, бо ҳам бозӣ карданд. Аз ин рӯ якдигарро имтиҳон кардан дар оғози омодагиҳо ба ин мусобиқаҳои бонуфуз аз манфиат холӣ набуд ва мураббиён имкон ёфтанд, ки дастпарваронашонро аз назар гузаронанд.

Дар нимаи аввали  бозии таҷрибавӣ ҳунарнамоии футболбозони ҷавони кишвар –дастаи мунтахаби олимпӣ ҷолибу диданӣ буд. Ба онҳо муяссар гардид, ки аввалин шуда, ҳисобро кушоянд. Дар дақиқаи 17-уми вохӯрӣ баъди хатои футболбозони «Истиқлол» Саидмухтор Азимов аз масофаи дур бо зарбаи ниҳоят сахт ҳисобро боз кард.

Сармураббии нави дастаи «Истиқлол» Ҳаким Фузайлов дар ин вохӯрӣ як зумра бозингаронеро, ки барои ба ҳайати «Истиқлол» шомил шудан ба Душанбе омадаанд, аз назар гузаронид. Комрон Турсунов дар дақиқаи 27-ум ҳисобро баробар кард. Дар нимаи дуввум бозингари нави «Истиқлол» Урош Томовичи серб аз зарбаи пеналтӣ  чемпионҳоро ба сафи пеш баровард. Бори дигар  Комрон Турсунов дар дақиқаи 66-ум голи дуюми худ ва сеюми Истиқлолро ба ҳадаф расонд.

Голи охиринро дар ин дидори дӯстона Нозим Бобоҷонов зад ва бозӣ бо ҳисоби 4 бар 1 ба фоидаи дастаи «Истиқлол»  ба анҷом расид.

Вохӯрии таҷрибавӣ

«Истиқлол» — дастаи мунтахаби олимпӣ (U-23) – 4:1

Голҳо: Саидмухтор Азимов, 18 (0:1). Комрон Турсунов, 27 (1:1). Урош Томович, 58 аз пеналтӣ (2:1). Комрон Турсунов, 66 (3:1). Нозим Бобоҷонов, 68 (4:1).

Пеналтиро ба ҳадаф нарасонд: Кароматулло Саидов, 73 (тири дарвоза).

«Истиқлол» (Душанбе): Беҳруз Хайриев, Амирбек Ҷӯрабоев (Фирӯз Қараев, 56), Искандар Ҷалилов (Шаҳром Раҷабов, 81), Бахтиёр Қаландаров, Аҳтам Назаров, Сӯҳроб  Ҷалилов (Сорбон Ғиёсов, 74), Ҳикматулло Расулов (Шаҳром Сулаймонов, 56), Нозим Бобоҷонов, Фатҳулло Фатҳуллоев (Фарҳод Қосимов, 68), Урош Томович (Шаҳром Самиев, 69), Комрон Турсунов (Муҳаммад Ҳакимзода, 79).

Дастаи мунтахаби олимпӣ (U-23):

Рустам Ятимов, Ҳусейн Нурматов (Дороб Эргашев, 79), Зоир Ҷӯрабоев (Табрези Давлатмир, 53), Ваҳдат Ҳанонов, Алишер Баротов, Шервони Мабатшоев, Саидмухтор Азимов, Муҳаммадҷон Раҳимов (Абдулмумин Забиров, 65), Кароматулло Саидов, Шериддин Бобоев, Амирҷон Сафаров (Далер Ёдгоров, 65).

Довари вохӯрӣ: Гулмуроди Саъдулло (Душанбе).

Акнун олимпичиёни мо марҳилаҳои навбатии тайёриро ба бозиҳои интихобии Чемпионати Осиё дар Қатар мегузаронанд ва дар мусобиқаи байналмилалии  «Чор миллат» иштирок мекунанд.

«Истиқлол» рӯзҳои наздик боз як бозии таҷрибавии худро бо дастаи мунтахаби наврасони то 17-солаи Тоҷикистон барпо менамояд.