Кормандони Кумитаи ҳолатҳои фавқулода ҳаёти боз як нафарро наҷот доданд
![](https://khovar.tj/wp-content/uploads/2019/01/3.jpg)
ДУШАНБЕ, 30.01.2019./АМИТ «Ховар»/. Маркази матбуотии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар дод, ки наҷотбахшони ин кумита шоми 28 январ як ҷавонзани 27-соларо, ки мехост худро аз болои пули кӯҳна дар дарёи Сир партофта, худкушӣ кунад, наҷот додаанд.
«Ин хонум дар як муддати кӯтоҳ дар гирдоби мавҷи азиму хурӯшони дарё монд. Маъмулан дар ин қитъа дарё басо пурталотум ҷорӣ мешавад. Наҷотдиҳандагон занро ба мушкилӣ аз марг наҷот доданд, вақте аз об берун оварданд, вай дар ҳоли изтиробу ҳарос буд», – гуфта мешавад дар иттилоияи кумита.
Феълан ин зани сокини шаҳри Бӯстон дар бемористон қарор дошта, мақомот сабаби қасди худкушии ӯро таҳқиқ мекунанд.