МО – ЗИДДИ ДОПИНГ! Дар Душанбе барои мураббиёни варзиш машварати омӯзишӣ оғоз гардид

Январь 8, 2019 09:09

ДУШАНБЕ, 08.01.2019 /АМИТ «Ховар»/. Бо иқдоми Кумитаи миллии олимпии Тоҷикистон дар доираи Барномаи «Тибби варзишӣ ва муҳофизати варзишгарон»  7 январ   дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон     машварати омӯзишӣ оғоз гардид.

Дар ин бора корманди  Кумитаи миллии олимпии Тоҷикистон Умаралӣ Сафаралӣ   ба мухбири АМИТ «Ховар» хабар дод.

Зикр шуд,   ки ба машварат мураббиёни федератсияҳо ва мактабҳои варзишии шаҳри Душанбе ҷалб гардидаанд. Бо сабаби он ки мураббиён варзишгаронро назорат намуда, ба онҳо машварат медиҳанд, огоҳ будани онҳо аз қоидаҳои мубориза бо допинг ба манфиат хоҳад буд.

Ба иштирокчиён мутахассисони соҳа дар мавзӯъҳои «Допинг чист?», «Санадҳои асосии танзимкунандаи фаъолиятҳои зидди допинг», «Таъсис ва вазифаҳои Агентии ҷаҳонии зидди допинг», «Чораҳои байналмилалии мубориза бо допинг дар варзиш», «Чораҳои мубориза бар зидди допинг дар сатҳи ҳукуматҳо», «Шиносоӣ бо рӯйхати доруҳои мамнуъ дар варзиш», «Тартиби гузаронидани ташхиси допинг», «Натиҷаҳои истифодаи допинг ва таъсири он ба мартаба ва ҳаёти шахсии варзишгар» ва ғайра давоми се рӯз маърӯза мехонанд.

Дар рӯзи аввал котиби генералии Кумитаи миллии олимпии Тоҷикистон, раиси Ташкилоти миллии зидди допинги Тоҷикистон Муҳаммадшо Абдуллозода ва директори генералии Кумитаи миллии олимпии Тоҷикистон Эркин Латипов маърӯза карданд.

Зикр гардид, ки Ҳукумати Ҷумҳурии Тоҷикистон барои мубориза бо допинг дар варзиш тамоми тадбирҳоро меандешад. Аз ҷумла, дар шаҳри Душанбе Маркази тавонбахшии варзишгарон амал мекунад, ки мақоми ҷумҳуриявӣ дорад ва бо дастури Пешвои миллат, Президенти Кумитаи миллии олимпии Тоҷикистон муҳтарам Эмомалӣ Раҳмон дар муҳлати наздик аз ҷониби Вазорати тандурустӣ ва ҳифзи иҷтимоии аҳолӣ бо дастгоҳҳои техникии муосир муҷаҳҳаз хоҳад гашт.

Ёдовар мешавем, ки   Агентии ҷаҳонии зидди допинг соли 1999 таъсис ёфтааст. Он дар тамоми ҷаҳон бар зидди истифодаи допинг аз ҷониби варзишгарон мубориза мебарад ва варзиши одилонаро таблиғ менамояд. Агентии ҷаҳонии зидди допинг ҳоло 5 озмоишгоҳи  қитъавӣ дорад ва ҳар сол то 3500 нафар варзишгарро аз ташхис мегузаронад.

Бо нигаронӣ изҳор гардид, ки соли 2018 4 варзишгари мо (2 нафар аз намуди вазнбардорӣ, якнафарӣ аз намудҳои дзюдо ва самбо) барои истифодаи доруҳои мамнуъ аз ҷониби Агентии ҷаҳонии зидди допинг маҳкум ва аз 2 то 4 сол аз иштирок дар мусобиқаҳои варзишӣ маҳрум гардиданд. Барои мубориза бо ин амали нанговар Кумитаи миллии олимпии Тоҷикистон ва Кумитаи кор бо ҷавонон ва варзиш тамоми тадбирҳоро меандешанд.

Бояд гуфт, ки чанде пеш дар Донишкадаи тарбияи ҷисмонии Тоҷикистон таҳти унвони «Мо-зидди допинг!» бо иштироки донишҷӯёни ин муассисаи таълимӣ машварат доир гардида буд ва чунин  машғулиятҳо пайваста баргузор мешаванд.

Январь 8, 2019 09:09

Хабарҳои дигари ин бахш

Конфедератсияи футболи Осиё тақвими бозиҳои марҳилаи интихобии Ҷоми Осиё-2026 оид ба футзалро тасдиқ намуд
ФУТБОЛ. Пагоҳ дар Душанбе марҳилаи интихобии Ҷоми Осиё-2026 байни дастаҳои занона дар гурӯҳи «H» оғоз мешавад
Рақибони дастаи мунтахаби футзали Тоҷикистон дар марҳилаи интихобии Ҷоми Осиё-2026 маълум шуданд
Дастаи мунтахаби футзали Тоҷикистон дар бозии дӯстона боз бар тими Амороти Муттаҳидаи Араб ғалаба кард
ФУТБОЛ. Фонди ҷоизавии мусобиқаи «Ҷоми Ҷавонӣ-2025» 60 ҳазор сомониро ташкил медиҳад
Бозии дӯстона байни дастаҳои мунтахаби олимпии Тоҷикистон ва Қирғизистон мусовӣ анҷом ёфт
ФУТБОЛ. Истиқлол» бар «Регар-ТадАЗ» ва «Вахш» бар «Хуҷанд» ғалаба намуд
ФУТЗАЛ. Дастаи мунтахаби Тоҷикистон дар бозии дӯстона бо тими мунтахаби Амороти Муттаҳидаи Араб ғолиб омад
«Регар ТадАЗ» дар мусобиқа оид ба волейбол дар ноҳияи Восеъ сазовори Шоҳҷоиза гардид
Дар Ҳисор бозии дӯстонаи дастаи олимпии Тоҷикистон (U-23) бо мунтахаби олимпии Қирғизистон доир мешавад
Федератсияи футболи Тоҷикистон соҳиби ҶОИЗАИ БИРИНҶИИ «FIFA FORWARD AWARDS» гардид
Дастаи мунтахаби футзали Тоҷикистон бо тими Амороти Муттаҳидаи Араб бозиҳои дӯстона анҷом медиҳад