Пас аз таҷдид имконияти истеҳсоли барқ дар неругоҳи «Қайроққум» 38% меафзояд – бардошт аз нишасти матбуотӣ

ХУҶАНД, 07.02.2019. /АМИТ «Ховар»/. Қарор аст, ки марҳилаи таҷдиду барқарорсозии иқтидори Неругоҳи барқи обии «Қайроққум» моҳҳои март–майи соли 2019 оғоз гардида, корҳо аз ҷониби ғолиби озмун- ширкати муштараки Франсияву Испания “GE Hydro France – Cobra Instalaciones Y Servicios SA” ба роҳ монда шаванд. Ҳоло бо ин ширкат шартномаи тарафайн ба имзо расида, маблағгузорӣ низ шудааст.  Доир ба ин масъала ва паҳлуҳои дигари фаъолияти ин неругоҳ сардори Шабакаҳои барқи вилояти Суғд Тӯра Атамов  6 феврал зимни нишасти матбуотӣ  иттилоъ дод.

Аз ҷумла, гуфта шуд, ки корҳои таъмиру таҷдид дар ду марҳила амалӣ шуда, пас аз пурра ба анҷом расидани барқарорсозӣ истеҳсоли неруи барқ дар НБО-и «Қайроққум» то 38% афзоиш ёфта, иқтидори он  аз 126 ҳазор кВт.соат то ба 174 ҳазор кВт.соат расонида шуда, муҳлати истифодаи таҷҳизот низ зиёд мегардад.

Ҳамчунин вобаста ба фаъолияти имрӯзаи неругоҳ гуфта шуд, ки соли 2018 дар НБО «Қайроққум» 748,9 млн.кВт.соат энергияи барқ истеҳсол гардидааст. Қабули умумии энергияи барқи истифодашуда зиёда аз 4,9 млрд.кВт. соатро ташкил додааст, ки 4,1 млрд.кВт.соати он энергияи барқи фоиданоки истифодашуда ба ҳисоб меравад. Инчунин дар ин давра дар неругоҳ таъмири асосии гидрогенератори №4, таъмири ҷории 5 гидрогенераторҳои боқимонда, трансформаторҳои қуввагӣ, таҷҳизоти асосии барқӣ, насосҳои технологию обёрӣ ва кранҳои борбардор гузаронида шуд.

Бояд гуфт, ки нақшаи сохтмони неругоҳи «Қайроққум» ҳанӯз соли 1940 тарҳрезӣ гардида, соли 1957 ба истифода дода шудааст. Давоми 62 соли корӣ аксари таҷҳизоти он кӯҳнаву таъмирталаб гардида, ниёз ба таъмиру таҷдид ба миён омад.  Айни ҳол  системаи энергетикии вилояти Суғд Неругоҳи барқи обии «Қайроққум» ва шаш шабакаи барқии минтақавиро, ки аз 18 шабакаи шаҳру ноҳиявӣ иборатанд, дар бар мегирад.