Академияи ВАО-и Тоҷикистон: се соли фаъолият ва вазифаҳо барои оянда

Март 1, 2019 16:46

ДУШАНБЕ, 01.03.2019/АМИТ «Ховар»/.  Имрӯз 1 март  аз таъсиси «Академияи воситаҳои ахбори   оммаи Тоҷикистон» се сол сипарӣ гардид.  Дар ин росто, дар Душанбе бо иштироки ҷомеаи журналистони Тоҷикистон, намояндагони идораҳои марбута,  устодону донишҷӯёни бахши рӯзноманигории донишгоҳҳои мамлакат  дар мавзӯи «Омода намудани  мутахассисони медиа дар шароити муосир» ҳамоиш доир гардид. Ҳамоиши мазкур  дар асоси дастуру супоришҳое, ки  Пешвои миллат  20 феврал дар ҷараёни вохӯрӣ бо намояндагони ВАО-и давлатии мамлакат изҳор доштанд, гузаронида шуд. Дар он масъалаҳои марбут ба рушди журналистика дар шароити муосири ҷомеаи Тоҷикистон ва фаъолияти минбаъдаи Академияи воситаҳои ахбори омма матраҳ гардиданд.

Раиси Иттифоқи журналистони Тоҷикистон, директори Муассисаи давлатии «Академияи воситаҳои ахбори   оммаи Тоҷикистон» Зинатуллоҳ Исмоилзода ин сана ва фарорасии фасли баҳорро ба аҳли толор табрик гуфта, зикр кард, ки  се сол муқаддам, аниқтараш 1 марти  соли 2016  бо иштироки Пешвои миллат дар мамлакат се муассисаи давлатӣ — «Академияи ВАО- и Тоҷикистон», телевизионҳои «Синамо» ва «Варзиш»  ифтитоҳ ёфта, фазои  иттилоотии кишварро мукаммал гардониданд.

Мавсуф доир ба  фаъолияти  «Академияи ВАО-и Тоҷикистон»  гуфт, ки дар ин муддат  «Академияи ВАО-и Тоҷикистон»  барои кормандони эҷодию техникии ВАО-и чопию  электронии давлатӣ  ва мустақил  машғулиятҳои омӯзишӣ ва дарсҳои маҳорат ташкил намуд. Дар онҳо мутахассисони ватанию хориҷӣ  дар бахшҳои гуногун  дарс гуфтанд.  Ҷалби мутахассисони варзидаи соҳа  ҷиҳати ба бозомӯзӣ фаро гирифтани  рӯзноманигорони ҷавон ва ҳайати  техникии шабакаҳо барои   татбиқи усулҳои  мусоири журналистика  ва истифодаи  самараноки  технологияҳои  иттилоотии  замони имрӯз мусоидат менамояд.

Дар ҳамоиш ҳамзамон  раиси Кумитаи Маҷлиси намояндагон оид ба корҳои байналмилалӣ, иттиҳодияҳои ҷамъиятӣ ва иттилоот   Олимҷон  Салимзода  доир ба нақши Парлумони Тоҷикистон дар таҳияи қонунҳо вобаста ба фаъолияти ВАО-и кишвар, ҷойгоҳи ВАО дар рушди ҷомеаи муосири Тоҷикистон, татбиқи барномаи рушди пахши рақамӣ дар кишвар ибрози назар намуд.

Инчунин дар ҷараёни хамоиш олимону устодони бахши журналистика дар мавзӯъҳои  «Стандартҳои  таълимии  ихтисосҳои журналистӣ  дар Тоҷикистон: вазъ ва дурнамо», «Роҳу усулҳои  навини тарбияи  кадрҳои журналистӣ», «Такмили ихтисоси  кормандони ВАО дар  дохил ва хориҷи кишвар», «Зарурат ва дурнамои  ихтисоси журналистӣ  бо назардошти  таҳаввулоти техникӣ дар  муҳити чандрасонаӣ» ва «Амалияи омода намудани  кадрҳои журналистӣ: воқеият ва имконият» маърӯза намуда,  дар самти омода намудани мутахассисони   ВАО дар шароити муосир табодули назар карданд.

Март 1, 2019 16:46

Хабарҳои дигари ин бахш

Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид
Донишҷӯдухтарони Донишгоҳи давлатии Кӯлоб ба меҳмонони хориҷӣ либосҳои миллиро намоиш доданд
Дар Институти биологии Помир озмоишгоҳи биотехнологӣ ба истифода дода шуд