ФУТБОЛ: имрӯз тақдири дастаи «Хуҷанд» дар Ҷоми Конфедератсияи футболи Осиё ҳал мегардад

ДУШАНБЕ, 13.03.2019. /АМИТ «Ховар»/.  Имрӯз, 13 март дар Варзишгоҳи «20- солагии Истиқлолияти Тоҷикистон»-и шаҳри Хуҷанд дар бозии ҷавобии марҳилаи плей-оффи Ҷоми КФО-2019 байни дастаҳои «Хуҷанд» (Тоҷикистон) ва «Аҳал» (Туркманистон) тақдири як роҳхат ба гурӯҳи «Д»-и мусобиқот ҳал мегардад.  Бозии аввали ин дастаҳо дар шаҳри Ашқобод як ҳафта пеш бо натиҷаи 1:1 ҷамъбаст гардида буд. Оғози вохӯрӣ соати 14:00 ба вақти Душанбе дар назар аст.

Дар нишасти хабарии пеш аз бозӣ, ки дирӯз гузашт, сармураббии «Хуҷанд» Нумонҷон Юсупов иброз дошт, ки «дастаи «Хуҷанд»  ба бозии ҷавобӣ омодагии хуб дидааст ва бачаҳо танҳо барои ғалаба   вориди  майдон мешаванд». Ӯ  бо истифода аз фурсати муносиб тамоми мухлисонро барои дастгирии «Хуҷанд» ба варзишгоҳ даъват намуд.

То ба ҳол дастаҳои футболи Тоҷикистон муваффақ нашудаанд, ки дар гурӯҳи Ҷоми КФО  ду намоянда дошта бошанд. Баръакс Қирғизистон (2017) ва Туркманистон дар мавсими футболи соли 2018 бо ҳузури ду даста дар гурӯҳи «Д» барои Ҷоми КФО мубориза бурдаанд.

Мо ба дастаи «Хуҷанд» дар ин бозии ниҳоят муҳим комёбӣ хоста, мухлисонро барои дастгирӣ ба варзишгоҳ даъват мекунем.