Вазорати корҳои дохилӣ аз ошкор шудани куштор дар шаҳри Бӯстон хабар медиҳад…

Март 28, 2019 10:20

ДУШАНБЕ, 28.03.2019./АМИТ «Ховар»/. Вазорати корҳои дохилии Ҷумҳурии Тоҷикистон аз ҳолатҳои дуздиву авбошӣ, қаллобӣ ва дигар ҷиноятҳои содирнамудаи баъзе шаҳрвандон ҳамарӯза хабар медиҳад. Ин ҳолат новобаста аз таъмини тартиботи ҷамъиятӣ ва хизмати шабонарӯзии кормандони милитсия аз сабаби ноогоҳӣ, надоштани маърифати ҳуқуқии шаҳрвандон ва нодида гирифтани талаботи қонун аз ҷониби гумонбарон рух медиҳад. Инак, чанде аз  чунин ҳолатҳоро  барои хонандагони АМИТ «Ховар» пешниҳод мекунем.

Ошкор шудани куштор дар шаҳри Бӯстон

Дирӯз тахминан соати 08:20, дар назди партовгоҳи маҳаллаи Рӯдакии шаҳри Бӯстон ҷасади зани 38-солаи сокини шаҳри мазкур, зодаи ноҳияи Б.Ғафуров, бе ҷойи зисти доимӣ, бо аломатҳои марги маҷбурӣ дарёфт карда шуд.

Ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони милитсия марди рустабори 30-солаи зодаи шаҳри Истаравшан, бе ҷои зисти доимӣ, ки пеш бо моддаи 244 Кодекси ҷиноятии Ҷумҳурии Тоҷикистон суд шудааст, бо гумони одамкушӣ дастгир карда шуд.

Номбурда 25 марти соли 2019, тахминан соати 17:30, ҳангоми дар маҳаллаи Рӯдакии шаҳри Бӯстон қарор доштанаш, зани ҷабрдидаро барои тасарруф намудани телефони мобилии тамғаи «Алкател» гумонбар ҳисобида, бо мақсади аз ҳаёт маҳрум сохтан ба узвҳои ҳаётан муҳимаш якчанд маротиба задааст.

Дар натиҷа ҷабрдида ҷароҳатҳои вазнинӣ ҷисмонӣ бардошта, дар ҷойи ҳодиса ба ҳалокат расидааст.

Рабудани таҷҳизот ба маблағи 200 ҳазор сомонӣ

Ба ШВКД дар шаҳри Ҳисор мактуби роҳбарияти ҶДММ «Соҳибкор-2002» ворид шудааст, ки моҳи феврали соли равон шахсони номаълум бо роҳи пинҳонӣ аз заводи хиштбарории ҶДММ «Соҳибкор-2002», воқеъ дар Ҷамоати деҳоти Сомони шаҳри Ҳисор як миқдор таҷҳизоти заводи мазкурро дуздида, аз ҷойи ҳодиса ғайб задаанд. Зарари расонидашуда 200 000 сомониро ташкил медиҳад.

Зимни доир намудани чорабиниҳои фаврӣ-ҷустуҷӯӣ аз ҷониби кормандони милитсия се нафар мардони 25, 28 ва 36-солаи сокинони шаҳри Ҳисор бо ҷурми дуздӣ дастгир гардиданд. Аз рӯи ин ҳодиса корҳои тафтишотӣ бурда мешаванд.

Ноуҳдабароии ронанда бо садамаи марговар анҷомид

25 марти соли 2019, тахминан соати 20:50, ронандаи мошини тамғаи «Мерседес-Бенс», Абдурозиқов Суҳроб Раҷабалиевич, соли таваллудаш 1981, сокини ноҳияи Данғара, ҳангоми ҳаракат аз самти шаҳри Норак ба самти шаҳри Ваҳдат, дар ҳудуди Ҷамоати деҳоти К.Исмоили шаҳри Ваҳдат аз уҳдаи идораи воситаи нақлиёт набаромада, пиёдагард Қурбонов Мирзомурод Тоирович, соли таваллудаш 1985, сокини деҳаи Заргари шаҳри мазкурро пахш намудааст.

Дар натиҷа, пиёдагард Қурбонов М.Т. ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст. Аз рӯи ин ҳодиса таҳқиқ идома дорад.

Дуздии молу ашёи рӯзгор аз хонаи истиқоматӣ

Ба шуъбаи ВКД дар шаҳри Кӯлоб марди 48-солаи сокини шаҳри мазкур бо ариза муроҷиат намудааст, ки шаби 24 ба 25 марти соли равон, тахминан соати 00:30, шахсони номаълум бо роҳи пинҳонӣ аз хонаи истиқоматиаш 1 адад яхдони тамғаи «Самсунг», 4 адад қолин, 2 адад «ДВД» ва молу ашёи рӯзгорро дуздида, аз ҷойи ҳодиса ғайб задаанд. Зарари расонидашуда 17 ҳазору 200 сомониро ташкил медиҳад.

Ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони милитсия марди 21-солаи сокини Ҷамоати деҳоти Зарбдори шаҳри Кӯлоб бо гумони дуздӣ дастгир карда шуд.

Муайян карда шуд, ки номбурда ҷинояти мазкурро бо ҳамроҳии «Умед» ном шахс содир намудааст. Барои муайян ва дастгир намудани ҷинояткор чорабиниҳои фаврӣ-ҷустуҷӯӣ идома доранд. Аз онҳо далелҳои шайъӣ гирифта шудаанд.

Март 28, 2019 10:20

Хабарҳои дигари ин бахш

Вазири мудофиаи Тоҷикистон дар Машварати навбатии вазирони мудофиаи давлатҳои аъзои Созмони ҳамкории Шанхай иштирок намуд
Вазири адлияи Тоҷикистон дар ҷаласаи нуздаҳуми Шурои вазирони адлияи давлатҳои аъзои ИДМ иштирок намуд
АРТИШИ МИЛЛӢ НА ТАНҲО ҚУДРАТИ ҲАРБӢ, БАЛКИ РАМЗИ ВАҲДАТ АСТ. Андешаҳои Вазири мудофиаи Ҷумҳурии Тоҷикистон дар ин мавзуъ
Котиби Шурои амнияти Тоҷикистон дар Вохӯрии 20-уми котибони шуроҳои амнияти давлатҳои аъзои СҲШ дар Пекин иштирок намуд
Қочоқи калони маводи мухаддир дар сарҳад бо Афғонистон пешгирӣ карда шуд
Дар ноҳияи Мир Саид Алии Ҳамадонӣ қочоқи беш аз 90 кг маводи мухаддир пешгирӣ гардид
Дар Хатлон гурӯҳи ҷиноятии фаромиллӣ бо 102 кг маводи нашъаовар дастгир шуд
Юсуф Раҳмон дар ҷаласаи навбатии Кумитаи Котибони шуроҳои амнияти давлатҳои аъзои СААД ва Вохӯрии дуюми Котибони шуроҳои амнияти Осиёи Марказӣ-Русия иштирок намуд
Намояндаи Тоҷикистон дар ҷаласаи Кумитаи амнияти САҲА дар Вена иштирок намуд
Дар шаҳри Турсунзода 70 кг маводи нашъаовар мусодира карда шуд
Дар вилояти Хатлон тақрибан 179 кг маводи нашъаовар мусодира ва гурӯҳи муташаккили фаромиллии қочоқбарон боздошт гардид
Дар Қазоқистон ҷаласаи роҳбарони воҳидҳои криминалии вазоратҳои корҳои дохилии ИДМ баргузор гардид