Ҷамолиддин Нуралиев бо ҳайати Бонки ҷаҳонӣ мулоқот намуд

ДУШАНБЕ, 03.04.2019/АМИТ «Ховар»/. 2 апрел муовини якуми раиси Бонки миллии Тоҷикистон Ҷамолиддин Нуралиев ҳайати Бонки ҷаҳониро таҳти роҳбарии иқтисодчии калон оид ба Ҷумҳурии Тоҷикистон хонум Гоар Гюлуман, ки бо сафари корӣ аз 1 то 10 апрели соли ҷорӣ дар Ҷумҳурии Тоҷикистон қарор дорад, ба ҳузур пазируфт. Дар ин хусус ба АМИТ «Ховар» аз Бонки миллии Тоҷикистон иттилоъ доданд.

Зимни мулоқот мусоҳибон оид ба муайян намудани афзалиятҳои Ҷумҳурии Тоҷикистон дар доираи Стратегияи миллии рушд, аз ҷумла чорабиниҳое, ки тавассути Барномаи шарикӣ бо  Ҷумҳурии Тоҷикистон дастгирӣ меёбанд, суҳбат намуданд.

Муовини якуми раиси БМТ Ҷамолиддин Нуралиев аз таъмини рушди иқтисодиёт дар солҳои охир сухан карда, оид ба лоиҳаи бузурги стратегӣ – «НБО Роғун» ва манфиатовар будани сохтмони иншооти мазкур на танҳо барои Ҷумҳурии Тоҷикистон, балки фароҳам овардани имкониятҳои васеъ барои тамоми минтақаи Осиёи Марказӣ ва кишварҳои ҳамсоя ибрози назар намуд. Ҷамолиддин Нуралиев дар мавриди хусусияти минтақавӣ доштани лоиҳа, фароҳам омадани шароити мусоид ҷиҳати дастрасӣ ба қувваи барқи арзон ва муфид барои кишварҳои минтақа таъкид намуда, барои саҳмгузории Бонки ҷаҳонӣ ҳамчун институти молиявии бонуфуз дар ҷалби сармояи хориҷӣ баҳри татбиқи минбаъдаи лоиҳаи «НБО Роғун» даъват ба амал овард.

Мусоҳибон инчунин оид ба як зумра масъалаҳои марбут ба иқтисодиёти ҷумҳурӣ, аз ҷумла тамоюли рушди иқтисодиёт, рафти корҳо ва нақшаи маблағгузории НБО «Роғун», саҳми барориши Евробондҳо дар татбиқи ин лоиҳа,  ҷараёни татбиқи лоиҳаи минтақавии интиқоли барқи «CASA-1000», ислоҳот дар соҳаи энергетика ва соҳаҳои мухталифи Тоҷикистон, рафти ҳамкорӣ бо ташкилотҳои молиявии байналмилалӣ  таваҷҷуҳ зоҳир намуданд.

Ҳайати Бонки ҷаҳонӣ ба корҳои зиёди анҷомдодашуда дар татбиқи лоиҳаи НБО «Роғун», мавҷуд будани ҷалби сармояи хориҷӣ ба ин иншооти стратегӣ, эҳтимолияти дурнамои содироти неруи барқ дар минтақа, таҷдиди ШСХК «Барқи тоҷик»  ва масъалаҳои муҳими иқтисодӣ таваҷҷуҳ зоҳир намуд.

Ҳадафи сафари ҳайати Бонки ҷаҳонӣ ба Тоҷикистон баррасии Стратегияи миллии рушд ва омодагии пешакии ҳисоботи таҳлилӣ оид ба оқибатҳои макрофискалии сармоягузорӣ ба Неругоҳи барқии обии «Роғун»  арзёбӣ мегардад.