Ҷавонони тоҷик дар 8-умин олимпиадаи ихтироъкорони ҷавон соҳиби Шоҳҷоиза ва 7 медали тилло гардиданд

ДУШАНБЕ, 15.04.2019 /АМИТ «Ховар»/.  Ҷавонону  наврасони тоҷик  дар 8-умин Олимпиадаи ихтироъкорони ҷавон  дар Малайзия аз фанни физика ва химия сазовори ҷойи аввал гардида, Шоҳҷоиза ба даст оварданд.       Дар ин бора ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон  хабар доданд.

Бино ба иттилои манбаъ,  8- умин Олимпиадаи ихтироъкорони ҷавон аз 12 то 14 апрели соли равон  баргузор шуда, дар он намояндагони   25 давлати дунё  иштирок намуданд.

Тоҷикистонро дар ин олимпиада  Маҳваш Қурбонова (1), Маҳноза Кабирова (1), Субҳиноз Беғамова (1), Меҳроб Қосимов (1), Акмал Кингаков (1), Муҳаммад Боқиев (1), Сиёвуш Султонзода (1), Фариддун Муродов (2), Хусрав Муродзода (2), Меҳрон Нуралиев (3) ва Рустам Зиёев (3) муаррифӣ намуда, бо нишон додани беҳтарин лоиҳаҳои инноватсионӣ ва илмии хеш  соҳиби  7 медали тилло, 2 медали нуқра ва 2 медали биринҷӣ гардиданд.

Мавриди зикр аст, ки Маҳваш Қурбонова ва Маҳноза Кабирова волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон  ва ҳамзамон гирандагони стипендияи Президенти Ҷумҳурии Тоҷикистон дар соли 2017-2018 мебошанд.