Дар Хатлон масъалаи дастгирии соҳибкории истеҳсолӣ ва беҳтар намудани фазои сармоягузорӣ баррасӣ гардид

ДУШАНБЕ, 25.04.2019/АМИТ «Ховар»/. Дар шаҳри Бохтар -маркази маъмурии вилояти Хатлон дар мавзӯи «Дастгирии соҳибкории истеҳсолӣ, беҳтар намудани фазои сармоягузорӣ дар доираи 300 рӯзи ислоҳот» бо иштироки   соҳибкорон, роҳбарон ва масъулони корхонаҳои ресандагӣ, бофандагӣ, рангкунӣ,  кешбофӣ ва дӯзандагии шаҳру навоҳии вилояти Хатлон нишаст доир гардид.

Вохурӣ бо ибтикори Кумитаи давлатии сармоягузорӣ ва идораи амволи давлатии Ҷумҳурии Тоҷикистон дар ҳамкорӣ бо Вазорати саноат ва технологияҳои  нави ҷумҳурӣ,  Мақомоти иҷроияи маҳаллии ҳокимияти давлатии вилояти Хатлон ва Иттифоқи рушди бахши хусусии Тоҷикистон  созмон дода шуд. Ҳадаф аз баргузории ин нишаст  иҷрои қарори Ҳукумати Ҷумҳурии Тоҷикистон «Дар бораи Нақшаи чорабиниҳо оид ба амалӣ намудани 300 рӯзи ислоҳот ҷиҳати дастгирии соҳибкорӣ ва беҳтар намудани фазои сармоягузорӣ дар Ҷумҳурии Тоҷикистон»  мебошад. Зимни ин нишаст роҳбарону мутахассисони корхонаҳои коркарди ниҳоии нахи пахта- ресандагӣ, бофандагӣ, рангкунӣ, кешбофӣ ва дӯзандагии вилоят дар якҷоягӣ бо дигар иштирокдорон доир ба    муайян намудани мушкилоти ҷойдоштаи соҳа ва роҳи ҳалли онҳо  муколамаи озод намуданд, ки он дар  рушди минбаъдаи ин соҳа манфиат меорад.