ДАРАХТ БИНШОН! Дар ҳудуди Осоишгоҳи Вазорати корҳои дохилӣ дар ноҳияи Рашт маъракаи ниҳолшинонӣ доир гардид

ДУШАНБЕ, 08.04.2019. /АМИТ «Ховар»/. Рӯзҳои истироҳатӣ ҷиҳати сабзазоркунӣ ва шинонидани ниҳолҳои мевадиҳандаю сояафкан дар атрофи биноҳои маъмурӣ ҳайати шахсии Раёсати ВКД дар минтақа ва ноҳияи Рашт маъракаи ниҳолшинонӣ гузарониданд.

Тавре аз Вазорати корҳои дохилӣ ба мухбири АМИТ «Ховар» хабар доданд, дар маъракаи ниҳолшинонӣ сардори РВКД дар минтақа ва ноҳияи Рашт Сафиало Азизуллозода, сардорони шуъбаҳои ВКД дар минтақаи мазкур ва ҳайати шахсии Раёсат аз табиати зебо ва ҳавои мусоид пурсамар истифода бурда, дар ҳудуди Осоишгоҳи Вазорати корҳои дохилӣ дар ноҳияи Рашт зиёда аз 1000 адад ниҳолҳои мевадиҳанда, аз қабили себу нок ва дигар ниҳолҳои сояафкан шинониданд.

Ҳайати шахсии РВКД дар минтақа ва ноҳияи Рашт маъракаи ниҳолшинониро иқдоми неку созанда арзёбӣ намуда, изҳор доштанд, ки ба истиқболи ҷашни 30-солагии Истиқлолияти давлатии Ҷумҳурии Тоҷикистон корҳои бунёди боғу сабзазоркунии муҳити зист ва ободу зебо намудани атрофи биноҳои маъмуриро вусъат медиҳанд.