Кумитаи ҳолатҳои фавқулода: «Дар се моҳи сипаригардида зиёда аз 500 офати табиӣ ба қайд гирифта шуданд»

ДУШАНБЕ, 16.04.2019. /АМИТ «Ховар»/. Дар се моҳи сипаригардидаи соли равон дар қаламрави Тоҷикистон зиёда аз 500 офати табиӣ ба қайд гирифта шудаанд, ки 12-тои он ба аҳолӣ ва иқтисодиёти мамлакат зарар расониданд.

Дар ин бора зимни ҷаласаи мушовараи  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон оид ба натиҷаҳои семоҳаи аввали соли равон, ки таҳти роҳбарии Раиси Кумита Рустам Назарзода баргузор гардид, гуфта шуд.

«Диққати асосӣ ба роҳандозии корҳои соҳилмустаҳкамкунӣ, фаъолиятҳои ҳамарӯзии неруҳои мусаллаҳи Кумита, таъминоти ақибгоҳ, истифода, нигоҳдошт ва таъмири техника ва силоҳҳо, риояи интизоми ҳарбӣ ва ба вуҷуд овардани шароит барои хизмати ҳарбии сарбозон зоҳир карда шуд»,- иттилоъ дод манбаъ.

Рустам Назарзода таваҷҷуҳи роҳбарони воҳидҳои Кумитаро ба омодагии фаврӣ ва касбиву босаводона дар вокуниш ба лағжиши эҳтимолии тарма, омадани сел, сангрезишҳо, болоравии сатҳи оби рӯдхонаҳо дар давраи баҳор ва тобистон ҷалб намуд.

«Ба роҳбарони раёсатҳои дахлдор супориш дода шуд, ки оид ба омӯзишҳои иловагии минтақаҳои хатарзо гурӯҳҳои махсус созмон дода, миёни аҳолӣ оид ба мудофиаи гражданӣ тамринҳои ғайринавбатӣ ба роҳ монанд», — илова намуд манбаъ.