Маркази ёрии таъҷилии тиббии Хоруғ соҳиби чор мошини тамғаи «Toyota» гардид
![](https://khovar.tj/wp-content/uploads/2019/04/moshinhoi-erii-tachili-.jpg)
ХОРУҒ, 18.04.2019 /АМИТ «Ховар»/. Маркази ёрии аввалини тиббии шаҳри Хоруғ соҳиби чаҳор мошини муосири тамғаи «Toyota» гардид. Ин кумак дар доираи ҳамкории Ҳукумати Ҷумҳурии Тоҷикистон ва Сафорати Амрико дар соҳаи ҳифзи сиҳатии мардум сурат гирифт.
Сардухтури маркази мазкур Давлат Алиназаров аз чунин дастгирӣ изҳори хушҳолӣ карда гуфт, ки «ин намуди мошинҳо барои иқлиму табиати минтақаи кӯҳистон мувофиқ ва мутобиқанд. Бо мошинҳои кӯҳна дар фасли зимистон ба маҳаллаҳое, ки дар доманакӯҳҳо ҷойгиранд, баромадан душвор буд. Дар ҳоле ки бемори вазнин ба ёрии фаврӣ ниёз дошт, бо онҳо вақти зиёд сарф мешуд. Ҳарорати ҳавои даруни мошин низ сард буд. Ҳоло ҳамаи ин мушкилот паси сар шуданд. Умедворам, ки ҳамкасбони мо бо истифода аз чунин шароити мусоид хизматрасонии тиббиро боз ҳам беҳтар ба роҳ мегузоранд».
Сардухтури беморхона аз кормандони бахши техникии марказ даъват кард, ки воситаҳои нақлиётро дуруст ҳифзу нигоҳбонӣ кунанд. Дар шароити кӯҳистон ҳар сари чанд вақт бояд воситаҳои нақлиёт мавриди ташхиси техникӣ қарор гиранд. Ҳатто як нуқси кучаки техникӣ метавонад ҳам барои ронанда ва ҳам мусофирон хатари ҷиддӣ эҷод кунад.