Моҳи майи соли 2019 барқарорсозӣ ва таҷдиди НБО «Қайроққум» оғоз мегардад

Апрель 19, 2019 10:35

ДУШАНБЕ, 19.04.2019 /АМИТ «Ховар»/. Моҳи майи соли 2019 дар шаҳри Гулистон татбиқи лоиҳаи «Барқарорсозӣ ва таҷдиди Неругоҳи барқи обии «Қайроққум» оғоз мегардад. Мувофиқи лоиҳа, таҷдиди асосии неругоҳ ва иншооти ёрирасону гидротеникии он бояд марҳила ба марҳила аз нав карда шуда, иқтидори неругоҳ аз 126 МВт ба 174 МВт расонида шавад.

Тавре мудири шуъбаи рушди иҷтимоӣ ва робита бо ҷомеаи дастгоҳи раиси шаҳри Гулистон Илҳом Мадализода ба хабарнигори АМИТ «Ховар» Мавҷуда Анварӣ хабар дод, лоиҳаи мазкур бо маблағгузории Бонки аврупоии таҷдид ва рушд,  Бонки сармоягузории  Аврупо ва «Фонди байналмилалии иқлими сабз» дар ду марҳила амалӣ мегардад.

Ба иттилои манбаъ, муҳлати татбиқи лоиҳа аз оғози корҳо то интиҳо 57 моҳро ташкил медиҳад. Маблағи марҳилаи якуми лоиҳа 71 миллион доллари ИМА ва дар марҳилаи дуюм 88 миллион доллари амрикоӣ дар назар дошта шудааст. Маблағи умумии татбиқи лоиҳа 159 миллион доллари ИМА-ро ташкил медиҳад. Алҳол пудратчии асосии марҳилаи якуми татбиқи лоиҳаи «Барқарорсозӣ ва таҷдиди НБО-и «Қайроққум» низ муайян гардидааст.

Бино ба маълумоти Илҳом Мадализода, дар семоҳаи аввали соли 2019 ба иқтисодиёти шаҳри Гулистон 14,9 миллион сомонӣ сармоягузориҳои мустақим ҷалб гардидаанд. Аз он 2,9 миллион сомонӣ сармоягузориҳои мустақими хориҷӣ ва 12 миллион сомонӣ сармоягузориҳои дохилӣ мебошанд.

Сармоягузории хориҷӣ- ин сармоягузории мустақим буда, аз тарафи сармоягузорони хориҷии ҶСК «Қолинҳои Қайроққум» таҷҳизоти иловагии истеҳсоли ришта аз Германия ҷиҳати зиёд намудани ҳаҷми истеҳсоли қолинҳо ворид карда шудааст. Инчунин аз тарафи ширкати ватании ҶДММ «Маҳмуд ва Ко» ба маблағи 12 миллион сомонӣ корхонаи арматура ба истифода дода шуд.

Мавриди зикр аст, ки лоиҳаи «Барқарорсозии системаи обтаъминкунии шаҳрҳои шимоли Тоҷикистон», аз ҷумла дар шаҳри Гулистон низ амалӣ гардида, лоиҳаи мазкур бо дастгирии Бонки аврупоии таҷдид ва рушд бо маблағҳои кредитӣ ва грантӣ дар ҳаҷми умумии маблағи лоиҳавии 2, 4 миллион доллари ИМА идома дорад.

Ба иттилои манбаъ, дар доираи лоиҳаи мазкур дар самти «Барқарорсозии шабакаҳои обтаъминкунии шаҳри Гулистон» корҳои хобонидани зиёда аз 12 ҳазор (12384) метр қубурҳои полиэтиленӣ ва мумфаршкунии роҳи мошингард ба анҷом расид. Инчунин дар самти «Барқарорсозии чоҳ, истгоҳи насосии кӯтали 2-юм ва технологияи коммуникатсионӣ, сехи хлоркунӣ дар шаҳри Гулистон» корҳо ба анҷом расонида шуданд.

Ҳамзамон дар доираи лоиҳа 5 техникаи махсуси коммуналӣ, 5 таҷҳизоти таъмирӣ ва ёрирасон, 7 таҷҳизоти лабораторӣ ҷиҳати беҳтар ба роҳ мондани санҷиши оби нӯшокӣ ва як трактор харида шуд.  Дар маҷмӯъ аз оғози татбиқи лоиҳа дар шаҳри Гулистон 2296,2 ҳазор доллари ИМА аз худ карда шуда, лоиҳа дар арафаи анҷомёбӣ мебошад.

Апрель 19, 2019 10:35

Хабарҳои дигари ин бахш

Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Эмомалӣ Раҳмон: «Ба рушди Вилояти Мухтори Кӯҳистони Бадахшон зиёда аз 25 миллиард сомонӣ равона шудааст»
Дар Хадамоти гумрук моҳияти қонунҳои миллӣ тавзеҳ дода шуд
Эмомалӣ Раҳмон: «Дар Вилояти Мухтори Кӯҳистони Бадахшон амалисозии 9 барномаи рушди иҷтимоиву иқтисодӣ идома дорад»
Байни вилоятҳои Хатлони Тоҷикистон ва Ленингради Русия Созишномаи ҳамкорӣ ба имзо расид
Раҳмон Исломиддин дар ҷаласаи навбатии Шурои байнидавлатӣ оид ба стандартизатсия, метрология ва сертификатсияи давлатҳои аъзои ИДМ иштирок намуд
Дар Турсунзода Фестивали саводнокии молиявӣ баргузор шуд
Татбиқи тарҳи «CASA-1000» намунаи ҳамкории энергетики минтақавӣ мебошад
Ҷаласаи сеюми Комиссияи байниҳукуматии Тоҷикистону Ҷопон баргузор гардид
Байни «Амонатбонк» ва Федератсияи футболи Тоҷикистон шартномаи ҳамкорӣ ба имзо расид
Дар доираи ҳамкории Тоҷикистон бо Фонди байналмилалии рушди кишоварзӣ академияи бонкӣ таъсис дода мешавад
Харитаи роҳи Ҳадафи 7-уми Рушди Устувор барои Тоҷикистон расман оғоз гардид