Пахтакорони Турсунзода бо истифода аз ҳавои мусоид рӯзе дар 100 гектар чигит кишт мекунанд

ТУРСУНЗОДА, 20.04.2019 /АМИТ «Ховар»/. Кишоварзони шаҳри Турсунзода  то имрӯз  зиёда аз 600 гектар  чигит ва 8915 гектар ғалладонагиҳо кишт намудаанд.

Масъулини Раёсати кишоварзии шаҳри Турсунзода мегӯянд, ки деҳқонони ноҳия аз ҳавои мусоид самаранок истифода карда, дар як рӯз ба воситаи 30 адад тухмпошакҳо беш аз 100 гектар кишти чигит  мегузаронанд.

Имсол дар асоси нақшаи таҳиягардида кишоварзони шаҳри Турсунзода бояд дар 14011 гектар ғалладонагӣ, 2800 гектар пахта ва 500 гектар шолӣ кишт намоянд. Аммо  боронҳои пайдарпайи ҳафтаҳои охир ба ҳама намуди кишти зироат  монеа эҷод намудаанд.

Масъулини  Идораи давлатии беҳдошти замин ва обёрии шаҳри Турсунзода ба хабарнигори АМИТ «Ховар» иброз намуданд, ки барои сари вақт таъмин намудани зироати кишоварзӣ бо оби полезӣ дар масоҳати 12 км заҳбуру заҳкашҳоро ба миқдори 44 ҳазор метри кубӣ тоза намуда, дастгоҳҳои обкашии  панҷ  пойгоҳи обкашро таъмири ҷорӣ намудаанд. Дар айни замон корҳо дар ин самт идома доранд.