Татбиқи 70 лоиҳаи сармоягузории давлатӣ ба маблағи беш аз 31 миллиард сомонӣ дар Тоҷикистон

ДУШАНБЕ, 23.04.2019/АМИТ «Ховар»/. Бо дастгирии молиявии шарикони рушд айни замон дар Тоҷикистон 70 лоиҳа ба маблағи умумии 31,9 миллиард сомонӣ ё муодил ба 3,38 миллиард доллари амрикоӣ амалӣ гардида истодааст.

Ин нукта дар ҷаласае,  ки таҳти раёсати  муовини аввали Сарвазири Ҷумҳурии Тоҷикистон Давлаталӣ Саид доир ба ҷараёни татбиқи  лоиҳаҳои сармоягузории давлатӣ дар семоҳаи аввали соли равон дар Душанбе доир гардид, баён дошта шуд. Дар он  роҳбарони вазорату идораҳо, агентиҳои иҷроия ва марказҳои татбиқи лоиҳаҳо иштирок намуданд. Дар ин  хусус ба АМИТ «Ховар» аз Кумитаи давлатии сармоягузорӣ ва идораи амволи давлатӣ иттилоъ доданд.

Зикр шуд, ки дар таркиби маҷмӯи лоиҳаҳои амалкунанда маблағҳои қарзӣ 16,6 миллард сомонӣ,  маблағҳои грантӣ 13,8 миллиард сомонӣ, саҳми Ҳукумати Ҷумҳурии Тоҷикистон 1,37 миллиард сомонӣ ва дигар сарчашмаҳо, аз ҷумла саҳми корхонаҳои давлатии ҷумҳурӣ, мақомоти иҷроияи маҳаллии ҳокимияти давлатӣ, ҷамоатҳо (бенефитсиарҳо) 162,3 миллион сомониро ташкил медиҳад.

Манбаи маблағгузории маҷмӯи (портфели) лоиҳаҳои сармоягузории давлатии амалкунанда асосан аз сарчашмаҳои Бонки Осиёгии Рушд 889,6 миллион $, Бонки ҷаҳонӣ 579,8 миллион  $, Бонки аврупоии таҷдид ва рушд 506,4 миллион $, Ҷумҳурии Мардумии Чин 479,4 миллион $, Бонки Исломии Рушд 149,4 миллион $, Бонки аврупоии сармоягузорӣ 89,1 миллион $, Бонки осиёгии сармоягузориҳои инфрасохторӣ 87,5 милион $, Фонди саудии рушд 85 миллион $ ва Бонки германии рушд 70,9 миллион $ асос ёфтаанд.

Гуфта шуд, ки дар зарфи се моҳи аввали соли равон дар доираи лоиҳаҳои татбиқшаванда 669,9 миллион сомонӣ аз худ карда шудааст, ки ин дар маҷмӯъ ба 96 фоизи нақшаи молиявии давраи ҳисоботӣ баробар аст.

Ҳамзамон дар ҷаласа роҳбарони агентиҳои иҷроия ва татбиқкунанда доир ба ҷараёни татбиқ ва азхудкунии воситаҳои молиявии лоиҳаҳои давлатии сармоягузорӣ дар давраи ҳисоботӣ, мушкилот ва камбудию норасоиҳои ҷойдошта ва тадбирҳои андешидашуда ҷиҳати ҳалли онҳо гузориш доданд.

Дар анҷом ҷиҳати бартараф намудани камбудиҳо ба агентиҳои иҷроия ва татбиқкунандаи лоиҳаҳои давлатии сармоягузорӣ ва вазорату идораҳои марбута аз ҷониби муовини аввали Сарвазири мамлакат супоришҳои мушаххас дода шуд.