ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Сокинони деҳаҳои Гулободу Шарафи ноҳияи Рӯдакӣ бо оби нӯшокӣ таъмин гардиданд

РӮДАКӢ, 01.05.2019 /АМИТ «Ховар»/. Имрӯзҳо ба ифтихори ҷашни 30-солагии Истиқлолияти давлатии Ҷумҳурии Тоҷикистон дар саросари мамлакат корҳои созандагиву бунёдкорӣ бо маром идома доранд.

Дар назар аст, ки давоми се соли минбаъда дар ҳар як деҳа ва маҳалли аҳолинишин бунгоҳҳои тиббӣ, коргоҳҳои дӯзандагӣ, майдончаҳои варзишӣ, қасри фарҳанг, ҳаммом, сартарошхона,  кошонаи ҳусн, пулҳо ва боғҳои фарҳангию фароғатӣ бунёд карда шаванд.

Раванди ин қабил корҳои ободкорӣ дар ноҳияи Рӯдакӣ низ баръало эҳсос мегардад.  Ба ифтихори ин ҷашни миллӣ зиёда аз ҳазор нафар сокинони деҳаҳои Гулободу Шарафи Ҷамоати деҳоти Зайнабободи ноҳия бо оби нӯшокӣ таъмин гардиданд.

Тавре муовини раиси ҷамоат Шариф Калонов иттилоъ дод, сокинони деҳаҳои Гулободу Шараф солҳо инҷониб ба мушкилии нарасидани оби тозаи нӯшокӣ гирифтор буданд. Хушбахтона, соҳибкорони маҳаллӣ ду адад чоҳи амудӣ бо чуқурии 60-70 метр канданд, ки оби он аз ҷиҳати экологӣ тозаю гуворо буд.

Сокинону соҳибкорони ҷамоати деҳоти Зайнабобод то ҷашни 30- солагии Истиқлолияти давлатӣ зиёда аз 20 иншооти дорои аҳамияти маҳаллию ҷумҳуриявиро ба истифода медиҳанд. Баистифодадиҳии ду нуқтаи оби нӯшокӣ аз ҳамин ҷумла аст. Ҳамчунин дар ноҳдоираи ободу хуррам гардонидани маҳаллаҳо то имрӯз 2000 бех дарахтони сояафкану ороишӣ шинонида шудаанд.