Дар Дави миллии шаҳри Ҳисор панҷ ҳазор нафар сокинон иштирок намуданд

ДУШАНБЕ, 20.05.2019/АМИТ «Ховар»/. Ба ифтихори Рӯзи ҷавонон, ки ҳамасола дар Ҷумҳурии Тоҷикистон 23 май таҷлил мегардад, 19 май дар шаҳри Ҳисор мусобиқаи дучархаронӣ ва Дави миллӣ баргузор гардид.

Дар ин чорабиниҳои варзишӣ раиси шаҳри Ҳисор Шарифҷон Ҷумазода, роҳбарони корхонаву ташкилотҳо, наврасону ҷавонон, дар маҷмӯъ беш аз панҷ ҳазор нафар  сокинони шаҳр иштироки фаъолона намуданд.  Дар анҷом ғолибони Дави миллӣ ва дучархаронӣ бо  туҳфаҳо ва сипосномаҳои бахши ҷавонон ва варзиши Мақомоти иҷроияи ҳокимияти давлатии шаҳри Ҳисор  сарфароз гардиданд.

Ёдовар мешавем, ки Дави миллӣ бо ташаббуси Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ҳамзамон Президенти Кумитаи миллии олимпии Тоҷикистон мебошанд,  шурӯъ аз соли 2007, ҳамасола якшанбеи сеюми моҳи май дар арафаи Рӯзи ҷавонони Тоҷикистон  дар саросари ҷумҳурӣ  баргузор карда мешавад.  Ҳадаф аз баргузории он  тарғиби тарзи ҳаёти солим ва оммавӣ гардонидани варзиш мебошад.

Бояд тазаккур дод, ки  дар шаҳри Ҳисор  дар радифи Дави миллӣ соли дуюм аст, ки мусобиқаи дучархаронӣ дар сатҳи баланд   гузаронида мешавад.

Хотирасон мешавем, ки  шоми 23 май  бахшида ба  Рӯзи ҷавонони Тоҷикистон дар Варзишгоҳи «Ҷавонӣ» -и шаҳри Ҳисор барномаи фарҳангӣ-фароғатӣ  баргузор мегардад.