Дар Барселона ITMA — бузургтарин намоишгоҳи ҷаҳон оғоз ёфт, ки дар он ширкатҳои Тоҷикистон низ иштирок мекунанд

Июнь 20, 2019 08:46

ДУШАНБЕ, 20.06.2019/АМИТ «Ховар»/. Имрӯз  дар шаҳри Барселонаи Испания бузургтарин намоишгоҳи дастгоҳу таҷҳизоти нассоҷӣ ва дӯзандагӣ дар ҷаҳон — ITMA (www.itma.com) оғоз гардид, ки  дар он намояндагони ҳашт корхонаи истеҳсолкунандаи маҳсулоти нассоҷӣ ва дӯзандагии Тоҷикистон иштирок мекунанд.

Корхонаҳои «Ноҳид», «Ресандаи Қӯрғонтеппа», «Спитамен Тектайлз», «Ваҳдат», «Oртекс», «Раҳимов А.А.», «Лиман», «Meҳровар», инчунин Иттифоқи рушди бахши хусусии Тоҷикистон дар бузургтарин намоишгоҳи дастгоҳу таҷҳизот ва фанновариҳои соҳаи  нассоҷӣ ва дӯзандагӣ дар ҷаҳон, ки то 26-уми июн идома меёбад,  иштирок намуда, бо навгониҳои олами технологияи   соҳа  мазкур шинос мешаванд.

Сафари ҳайъати Тоҷикистон ба ин намоишгоҳ бо мусоидати Маркази тиҷорати байналмилалӣ (МТБ) ва бо маблағгузории Ҳукумати Швейтсария дар чаҳорчӯбаи Барномаи ҷаҳонии нассоҷӣ ва дӯзандагии МТБ сурат мегирад. Намояндагони ширкаҳоти консалтингии «ACT Development Group» ва «Business Consulting», шарикони маҳаллии МТБ дар ин намоишгоҳ ҳайъати Тоҷикистонро роҳбаладӣ мекунанд.

Намоишгоҳи ITMA, ки дар чор сол як бор баргузор мегардад, майдони пешсафи ҷаҳонии омӯзиш ва тавлиди идеяҳои тоза, дарёфти роҳҳои ҳалли самараноки мушкилоти мавҷуда ва ҳамкории муштарак барои рушди соҳибкорӣ мебошад. Дар  он тақрибан 1600 ширкаткунанда аз 46 кишвар маҳсулоти худро дар масоҳати 220 000 метри мураббаъ ба 120 000 боздидкунанадагон аз 147 кишвари ҷаҳон намоиш медиҳанд.

Ин чорабинӣ пешрафтатарин дастгоҳу таҷҳизот ва фанновариҳои соҳаро ба маъраз гузошта, барои шиносоӣ, робита пайдо кардан бо тасмимгирандагони калидӣ, коршиносони соҳа, омӯзиши тамоюлот, равандҳо ва масъалаҳои ҷаҳонии вобаста ба соҳаи нассоҷӣ ва дӯзандагӣ дар  машғулияту  ҳамоишҳое, ки дар ҳошияи намоишгоҳ баргузор мегарданд, имконият фароҳам месозад.

Роҳбари дафтари МТБ дар Тоҷикистон Саидмӯъмин Камолов зикр кард, ки навгониҳои технологӣ калиди муваффақияти саноати нассоҷиву дӯзандагӣ  маҳсуб мешавад.

«МТБ бо ITMA-2019 ба ҳайси созмони мусоидаткунанда ҳамкорӣ мекунад. Аз ин рӯ, шарикони барномаи мо  дастрасии афзалиятнок, имкониятҳои махсус барои шиносоӣ бо иштирокчиёни намоишгоҳ ва  иштирок дар  машғулиятҳои омӯзиширо  доранд. Ҳамчунин МТБ бо Маркази омӯзишии нассоҷӣ ва мӯди Федератсияи нассоҷӣ ва мӯди Сингапур ҳамкорӣ мекунад, ки дар ҷараёни намоишгоҳ барои мо барномаҳои махсуси боздиду шиносоӣ бо ғуфраҳои намоишгоҳ таҳия намудаанд», — афзуд номбурда.

Ҳайъати Тоҷикистон бар ин бовар аст, ки иштирок дар ин намоишгоҳ дарҳои навро барояшон боз мекунад.

Тавре мудири ширкати «Спитамен Текстайлз» Мирзоқодир Бақоев иброз дошт «мо аз ин имконияти нодир ҷиҳати барқарор кардани робитаҳои нави тиҷоратӣ бо истеҳсолкунандагони дастгоҳу таҷҳизоти навтарини соҳаи нассоҷӣ ва дӯзандагӣ, боло бардоштани сатҳи огаҳӣ аз роҳҳо ва василаҳои нави истеҳсол, коркарди маҳсулот, пайдо кардани шарикони нав барои ҳамкориву сармоягузорӣ, шиносоӣ бо технологияҳои муосири истеҳсоли ришта, матоъ, рангубор ва дӯзандагӣ хушҳолем. Ин намоишгоҳ ҳамчунин ба ҳайси макони муҳиме барои табодули таҷриба ва барқарор кардани робитаҳои нав хидмат мекунад».

Бояд илова кард, ки ITMA-2019 таҷҳизоти навтарини ҷаҳониро ба маърази бинандагон мегузорад ва самтҳои рушди технологияи ояндаро муаррифӣ менамояд. Дар ҷараёни намоишгоҳ МТБ ҳамчунин нахустин бор табодули таҷриба миёни ширкатҳо ва ассотсиатсияҳои соҳавии ҳамаи шаш кишвари баҳрагирандаи Барномаи нассоҷияшро баргузор мекунад, ки ин кишварҳо- Тоҷикистон ва Қирғизистон аз Осиёи Марказӣ ва чаҳор кишвари арабии Урдун, Миср, Тунис ва Марокаш мебошанд. Иштироки ширкатҳои Тоҷикистон  дар намоишгоҳҳои байналмилалӣ барои корхонаҳои шарики лоиҳа ҷиҳати ба намоиш гузоштани маҳсулоташон, шиносоӣ бо харидорони эҳтимолӣ ва барқарор кардани робитаҳои нави тиҷоратӣ, дарёфти маълумот доир ба бозорҳои мавҷуд ва нав, рақибон, ва талаботи бозори ҷаҳонӣ имконият фароҳам меорад.

Июнь 20, 2019 08:46

Хабарҳои дигари ин бахш

Дар Суғд барои дарёфти грантҳои раиси вилоят озмун баргузор мешавад
Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд
Сардхонаи муосири деҳоти «Файзи Истиқлол»-и ноҳияи Кӯшониён ба аҳолӣ хизмат мерасонад
«ТОҶИКИСТОН-2024». Дар Душанбе Намоишгоҳи байналмилалии универсалӣ доир мешавад
120 гектар замини канори деҳаи Ғӯсари шаҳри Панҷакент бо оби полезӣ таъмин мегардад