«Китоб-уш-шифо» ва «Феҳристи дастнависҳои шарқии Академияи илмҳои Ҷумҳурии Тоҷикистон» ба чоп расиданд
![](https://khovar.tj/wp-content/uploads/2019/06/Kitob-ush-shifo.jpg)
ДУШАНБЕ, 03.06.2019 /АМИТ «Ховар»/. Бахшида ба ҷашни 30-солагии Истиқлолияти давлатии Ҷумҳурии Тоҷикистон асарҳои пурарзиши «Китоб-уш-шифо»-и Абӯалӣ ибни Сино («Ҷумлаи чаҳорум андар баёни илоҳиёт») ва «Феҳристи дастнависҳои шарқии Академияи илмҳои Ҷумҳурии Тоҷикистон» интишор гардиданд. Ҳар ду китобро Муассисаи нашриявии «Дониш» бо дизайну ороиши ҷолиб ба нашр расондааст.
Тавре аз Маркази мероси хаттии Академияи илмҳои Ҷумҳурии Тоҷикистон ба хабарнигори АМИТ «Ховар» иттилоъ доданд, фанни сездаҳум андар илоҳиёти «Китоб-уш-шифо»-и оламшумули Шайхурраис Ибни Синоро беш аз 40 сол пештар донишманди тоҷик Сайиднуриддин Шаҳобуддинов аз арабӣ ба тоҷикӣ гардонида, бо пешгуфтору тавзеҳот омодаи чоп намудааст. Муҳаррири масъули китоб академик Мӯсо Диноршоев буда, он аз 554 саҳифа иборат аст.
Мазмуну муҳтавои беназир ва феҳристи мукаммали ба он афзудаи мутарҷиму таҳиягар китобро барои хонандагон ҷолибу хонданбоб гардонидааст.
Ҷилди 7-уми «Феҳристи дастнависҳои шарқии Академияи илмҳои Ҷумҳурии Тоҷикистон» бо забони русӣ идомаи шаш ҷилди қаблии он аст, ки аз ҷониби олимони варзидаи соҳа таҳти роҳбарии академик Абдуғанӣ Мирзоев дар миёнаи солҳои 1960-1988 ба дасти чоп расида буд. Ҷилди мазкур аз тарафи донишмандони тоҷик, аз ҷумла А.Алимардонов, Г. Лузянина, М. Мамедова, Л. Шварк, Қ. Элчибеков, Л. Додихудоева, М. Шарифов, С.Ализода, Б. Навбаҳорова, И. Мирзоев бо ширкату сарварии узви вобастаи АИ ҶТ Ҷ.Назриев барои чоп омода шуда, он аз 308 саҳифа иборат аст. Китоби мазкур мақому нуфузи байналмилалии феҳристнигории тоҷикро боло бурда, барои дастандаркорони соҳа дастури хуб аст.
Мавриди зикр аст, ки ба хотири сазовор истиқбол гирифтани ҷашни миллӣ — 30-юмин солгарди истиклолияти давлатӣ аз ҷониби донишмандони тоҷик ҳамчунин мероси гаронбаҳои Аҳмади Дониш, Саййидои Насафӣ ва Шамсиддин Шоҳин ба нашр расидаанд.