Тоҷикистон дар САҲА натиҷаҳои фаъолият дар самти безараргардонии минаҳо ва маҳви боқимондаҳои силоҳи сабуки оташфишонро муаррифӣ кард

Июнь 20, 2019 10:41

ДУШАНБЕ, 20.06.2019 /АМИТ «Ховар»/. 19 июни соли равон дар қасри Ҳофбурги шаҳри Вена ҷаласаи навбатии Форуми ҳамкории амниятии САҲА (FSC) доир гардид. Ҷаласаи мазкур таҳти раёсати Ҷумҳурии Тоҷикистон баргузор гардида, ба барномаҳои марбут ба мудирияти захираҳои силоҳи сабуки оташфишон ва захираҳои муҳимоти муқаррарӣ дар Осиёи Марказӣ бахшида шуда буд.

Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар ҳамоиш сардори Раёсати қӯшунҳои муҳандисии ситоди генералии Қувваҳои Мусаллаҳи Ҷумҳурии Тоҷикистон генерал-майор Саёрабек Бачабекзода ба ҳайси суханвари калидӣ роҷеъ ба барномаҳои марбут ба маҳви захираҳои силоҳи сабуки оташфишон ва муҳимоти муқаррарӣ, нигаҳдории онҳо, инчунин лоиҳаҳои безараргардонии башардӯстонаи минаҳо дар Тоҷикистон гузориш  пешниҳод  намуд.

Зимни суханронии худ намояндаи аршади ситоди генералии Қувваҳои Мусаллаҳи Тоҷикистон оид ба таҷрибаи ҳамкории мақомоти низомии кишвар бо САҲА ва дигар шарикони байналмилалӣ дар таҳия ва татбиқи «Барномаи мудирияти захираҳои силоҳи сабуки оташфишон ва муҳимоти муқаррарӣ дар Тоҷикистон дар солҳои 2004-2009» иттилоъ дод.

Таъкид гардид, ки дар доираи барномаи мазкур 26 ҳазор мил силоҳи сабуки оташфишон ва 34 тонна муҳимоти ҷангӣ маҳв карда шуда, 9 анбори махсуси нигоҳдории силоҳи сабуки оташфишон ва муҳиммоти муқаррарӣ бунёд ва 60 анбори силоҳ таъмир карда шуданд.

Айни замон Тоҷикистон бо САҲА дар амри гузариши пурраи Вазорати мудофиаи мамлакат  ба низоми электронии баҳисобгирии захираҳои силоҳи сабуки оташфишон ва муҳимоти низомӣ ҳамкории судманд  ба роҳ мондааст.

Генерал-майор Бачабекзода ба саҳми САҲА дар татбиқи «Барномаи давлатии безараргардонии башардӯстонаи минаҳо дар Ҷумҳурии Тоҷикистон» баҳои баланд дода, таъкид кард, ки аз соли 2009 то имрӯз ҳамкорӣ миёни Тоҷикистон ва САҲА натиҷаҳои назаррас додаанд.

Масалан, таъсиси ротаи безараргардонии башардӯстонаи минаҳо дар Вазорати мудофиаи Ҷумҳурии Тоҷикистон, ба поксозии 3 ҳазор км мураббаъ аз минаҳо, маҳви зиёда аз 16 ҳазор минаи зиддипиёдагард ва 3 ҳазор маводди гуногуни тарканда мусоидат кардааст.

Тазаккур дода шуд, ки ҷиҳати тавсеаи фаъолият дар ин раванд «Стратегияи миллии Ҷумҳурии Тоҷикистон оид ба фаъолияти башардӯстонаи зидди минаҳо» мавриди татбиқ қарор дода шудааст.

Июнь 20, 2019 10:41

Хабарҳои дигари ин бахш

Ҳамкории судманди Тоҷикистон ва сохторҳои Созмони Милали Муттаҳид баррасӣ карда шуд
Дар Женева самтҳои муҳими ҳамкории Тоҷикистон бо UNHCR баррасӣ карда шуданд
Байни ҳукуматҳои Тоҷикистон ва Ҷопон доир ба лоиҳаи «JDS» Ёддоштҳои табодулӣ ба имзо расиданд
Дурнамои рушди муносибатҳои минтақаҳои Тоҷикистон ва минтақаи Приморски Русия дар бахшҳои гуногун баррасӣ шуд
Вазири корҳои хориҷии Тоҷикистон бо сафири навтаъйини Ҷумҳурии Мардумии Чин мулоқот намуд
Дар Конфедератсияи Швейтсария имконоту зарфияти сайёҳии Тоҷикистон муаррифӣ гардид
Сафири Тоҷикистон бо ҳамватанони муқими ҳавзаи федералии Шарқи Дури Русия вохӯрӣ намуд
Давлатшоҳ Гулмаҳмадзода ва Сергей Кузнесов дурнамои ҳамкории дуҷонибаро баррасӣ намуданд
Рушди ҳамкории фарҳангии Тоҷикистон ва Эрон баррасӣ шуд
Дурнамои таҳкими ҳамкории гуногунсоҳаи Тоҷикистон ва Узбекистон баррасӣ карда шуд
Ҷалби сармоягузории Швейтсария ба бахшҳои калидии Тоҷикистон баррасӣ карда шуд
Дар Душанбе оид ба омодагӣ ба Форуми сармоягузорӣ дар соҳаи сайёҳӣ брифинг доир шуд